Indian Railway: రైలు ప్రయాణంలో సమస్యలా.. ఇదిగో ఇలా ఫిర్యాదు చేయండి..!

Railway complaints: రైల్వే ప్రయాణికుల నుంచి ఫిర్యాదుల స్వీకరణకు రైల్‌ మదద్‌ పేరిట సేవలను రైల్వే శాఖ అందిస్తోంది. ప్రయాణికులు వివిధ వేదికల ద్వారా ఫిర్యాదు చేసేందుకు వీలు కల్పిస్తోంది.

Published : 20 Sep 2022 12:24 IST

ఇంటర్నెట్‌ డెస్క్‌: దూర ప్రయాణమనగానే ఎక్కువ మంది ఓటేసేది రైళ్లకే. తక్కువ ఖర్చుతో సౌకర్యవంతంగా ప్రయాణించే వీలు దీని సొంతం. అయితే, రైల్వే సేవలపై చాలా మందికి ఫిర్యాదులున్నాయి. టాయిలెట్లు బాగాలేవనో, ఫ్యాన్లు తిరగడం లేదనో ప్రయాణికులు తరచూ ఆందోళన వ్యక్తంచేస్తుంటారు. అయితే, ఇలా అసౌకర్యం ఎదురైనా ఫిర్యాదు చేయడానికి మాత్రం చాలా మంది ముందుకు రారు. వాస్తవానికి రైల్వే శాఖ ప్రయాణికుల నుంచి ఫిర్యాదుల స్వీకరణకు రైల్‌ మదద్‌ (Rail Madad) పేరిట సేవలను అందిస్తోంది. ప్రయాణికులు వివిధ వేదికల ద్వారా ఫిర్యాదు చేసేందుకు వీలు కల్పిస్తోంది.

రైల్వే ప్రయాణం సౌకర్యవంతంగా ఎప్పటికీ గుర్తుండిపోయేలా చేయాలన్న సంకల్పంతో ఈ సౌకర్యాన్ని రైల్వే శాఖ తీసుకొచ్చింది. 24×7 ఈ సేవలు అందుబాటులో ఉంటాయి. ప్రయాణంలో ఏ సమస్య అయినా ఫిర్యాదు చేయొచ్చు. ఇందుకోసం రైల్‌ మదద్‌ వెబ్‌సైట్‌, యాప్‌, 139 టోల్‌ఫ్రీ నంబర్‌ను రైల్వే శాఖ అందుబాటులో ఉంచింది. ఇ-మెయిల్‌, పోస్ట్‌, సోషల్‌ మీడియా ద్వారా కూడా ఫిర్యాదు చేయొచ్చని రైల్వే శాఖ తెలిపింది. ప్రస్తుతం రోజుకు 5,226 ఫిర్యాదులు వస్తున్నాయని, సగటున ఒక గంటా 19 నిమిషాల్లోనే ఫిర్యాదులను పరిష్కరిస్తున్నట్లు రైల్వే మంత్రిత్వ శాఖ తెలిపింది.

ఫిర్యాదు.. పరిష్కారమిలా..

రైల్వే ప్రయాణంలో ఏదైనా సమస్య తలెత్తినప్పుడు పైన తెలిపిన ఏ వేదిక ద్వారానైనా రైల్వే శాఖకు ఫిర్యాదు చేయొచ్చు. ఇందుకోసం పీఎన్‌ఆర్‌ నంబర్‌, మీ వ్యక్తిగత ఫోన్‌ నంబర్‌ ఇవ్వాల్సి ఉంటుంది. మీరు ఫిర్యాదు చేసిన వెంటనే ఆర్‌పీఎఫ్‌, ఎలక్ట్రికల్‌, హౌస్‌కీపింగ్‌.. ఇలా ఆ ఫిర్యాదు ఏ విభాగానికి చెందినదో ఆ విభాగానికి ఎస్సెమ్మెస్‌ ద్వారా అలెర్ట్‌ వెళుతుంది. టీటీఈకి కూడా సంబంధిత ఫిర్యాదు అందుతుంది. ఇదే ఫిర్యాదు డివిజన్‌ కంట్రోల్‌ సెల్‌కూ వెళుతుంది. అక్కడి సిబ్బంది రైలులోని ఆన్‌ బోర్డ్‌ సిబ్బందితో సమన్వయం చేస్తూ ఫిర్యాదు పరిష్కారమయ్యేలా చూస్తారు. మీరు చేసిన ఫిర్యాదుకు గానూ RRN నంబర్‌ మీకు అందుతుంది. ఆ నంబర్‌ ఆధారంగా మీ ఫిర్యాదు స్థితిని తెలుసుకోవచ్చు. అలాగే మీ ఫిర్యాదు పరిష్కారమైన వెంటనే ఎస్సెమ్మెస్‌ ద్వారా ఆ విషయం తెలియజేస్తారు. దానికి మీరు రేటింగ్‌ కూడా ఇవ్వొచ్చు.

చివరిగా: చాలా మంది రైల్వే సేవలపై అసంతృప్తి వ్యక్తంచేసేవారే కానీ.. ఫిర్యాదులు చేయడానికి మాత్రం ముందుకు రారు. సులువుగా ఫిర్యాదు చేసి పరిష్కరించుకునే వీలున్నప్పటికీ తాత్సారం చేసే వారే అధికం. మీరు చేసే ఫిర్యాదు మీకే కాదు మీ తోటి ప్రయాణికులకూ ఉపయోగపడొచ్చు. కాబట్టి ఇకపై రైలు ప్రయాణంలో మీకెదురయ్యే సమస్యలపై ఫిర్యాదు చేయడం మరిచిపోవద్దు.


Read latest Business News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని