Recession: మాంద్యం స్వల్పం.. తక్కువ కాలమే

అంతర్జాతీయంగా సీఈఓల అంచనా

దిల్లీ: ఆర్థిక మాంద్యం చుట్టుముడుతుందనే ఆందోళనలు పెరిగిన వేళ, ఊరట కలిగించే సర్వే నివేదికను కేపీఎంజీ విడుదల చేసింది. ఈసారి మాంద్యం సంభవించినా.. ఆ ప్రభావం స్వల్పంగా ఉంటుందని, అదీ తక్కువ కాలమేనని అంతర్జాతీయంగా 1300 మంది కంపెనీల ముఖ్య కార్యనిర్వహణాధికారు (సీఈఓ)ల్లో 58 శాతం మంది భావిస్తున్నారని కేపీఎంజీ 2022 సీఈఓ అవుట్‌లుక్‌ సర్వే పేర్కొంది. ఈ సీఈఓల్లో టాటా స్టీల్‌ నరేంద్రన్‌ కూడా ఉన్నారు. వచ్చే ఏడాది మాంద్యం సంభవించవచ్చని 86 శాతం మంది అంచనా వేస్తున్నారు. అత్యంత ఆందోళనకర అంశాల్లో మాంద్యం ఒకటని ఈ ఏడాది ప్రారంభంలో 9 శాతం మంది సీనియర్‌ ఎగ్జిక్యూటివ్‌లు చెప్పగా, ఈ సంఖ్య ప్రస్తుతం 14 శాతానికి పెరిగింది.

* మాంద్యం వల్ల కంపెనీల ఆదాయంపై 10 శాతం ప్రభావం పడొచ్చని 71 శాతం మంది అంచనా వేశారు. వృద్ధిపై ప్రభావం చూపొచ్చని 73 శాతం మంది తెలిపారు. మాంద్యం వస్తుందేమోనని 3 త్రైమాసికాలుగా జాగ్రత్తలు తీసుకున్నట్లు 76 శాతం మంది వెల్లడించారు.

* రాబోయే 6 నెలల పాటు ఆర్థిక వ్యవస్థ రాణిస్తుందనే విశ్వాసాన్ని 73 శాతం మంది వ్యక్తం చేశారు.

* రాబోయే మూడేళ్లు అంతర్జాతీయ వృద్ధి బాగుంటుందని భావించే వారి సంఖ్య 60 శాతం నుంచి 71 శాతానికి; తమ కంపెనీల వృద్ధి బాగుంటుందని విశ్వసిస్తున్న వారి సంఖ్య 60 శాతం నుంచి 85 శాతానికి పెరిగింది.

2023-24లో వృద్ధి 5.2 శాతం: నొమురా

భారత వృద్ధిరేటు ప్రస్తుత ఆర్థిక సంవత్సరంలో 7 శాతం, 2023-24లో 5.2 శాతంగా ఉంటుందని బ్రోకరేజీ సంస్థ నొమురా పేర్కొంది.