Breaking | Feedback | E-PAPER | Pratibha

Retail Inflation: హమ్మయ్య!.. 11 నెలల కనిష్ఠానికి రిటైల్‌ ద్రవ్యోల్బణం

Retail Inflation In November: రిటైల్‌ ద్రవ్యోల్బణం దిగొచ్చింది. నవంబర్‌ నెలలో 5.88 శాతంగా నమోదైంది. దీంతో ఆర్‌బీఐ నిర్దేశించుకున్న 6 శాతం లక్ష్యంలోపే నమోదైంది.

Published : 12 Dec 2022 19:16 IST

దిల్లీ: గత కొన్ని నెలలుగా కొరకరాని కొయ్యగా మారిన రిటైల్‌ ద్రవ్యోల్బణం (Retail inflation) ఎట్టకేలకు దిగొచ్చింది. నవంబర్‌ నెలలో (November) వినియోగదారుల సూచీ ఆధారిత (CPI) రిటైల్‌ ద్రవ్యోల్బణం 5.88 శాతంగా నమోదైంది. ముఖ్యంగా ఆహార పదార్థాల ధరలు తగ్గడం ఇందుకు దోహదం చేసింది. 11 నెలల్లో ఈ స్థాయిలో నమోదుకావడం ఇదే తొలిసారి. అంతేకాదు రిజర్వ్‌ బ్యాంక్‌ ఆఫ్‌ ఇండియా (RBI) నిర్దేశించుకున్న లక్ష్యానికి 4 (+/-2) శాతానికి లోపే నమోదు కావడమూ గమనార్హం. ఈ మేరకు కేంద్ర గణాంక కార్యాలయం (NSO) సోమవారం కీలక గణాంకాలను వెలువరించింది.

గతేడాది నవంబర్‌లో 4.91 శాతంగా ఉన్న వినియోగదారుల ధరల ఆధారిత రిటైల్‌ ద్రవ్యోల్బణం గత కొన్ని నెలలుగా 6 శాతానికి పైనే నమోదవుతూ వస్తోంది. అక్టోబర్‌లో సైతం 6.77 శాతం నమోదైంది. దీంతో రిజర్వ్‌ బ్యాంక్‌ ఆఫ్‌ ఇండియా రిటైల్‌ ద్రవ్యోల్బణాన్ని అదుపు చేసేందుకు వడ్డీ రేట్లను పెంచుతూ వచ్చింది. మొత్తంగా 2.25 శాతం మేర పెంచింది. ద్రవ్యోల్బణం కట్టడికి అర్జునుడిలా దృష్టి సారించామని చెప్పిన ఆర్‌బీఐ.. అదుపు చేయడంలో కొంతమేర విజయం సాధించింది. అయితే, రాబోయే 12 నెలలు మాత్రం 4 శాతానికి ఎగువనే ఉండే అవకాశం ఉందని అంచనా వేస్తోంది.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.