Reverse Mortgage Loan: మలి వయసులో మంచి ఆదాయం.. రివర్స్‌ మార్టగేజ్‌ గురించి తెలుసా?

ఇంటర్నెట్‌ డెస్క్‌: వృద్ధాప్యంలో ఉన్నవారికి రివర్స్‌ మార్టగేజ్‌ లోన్‌ ఒక మంచి ఆదాయ మార్గం. సొంతంగా ఇల్లు ఉంటే చాలు.. నెలనెలా ఆదాయం పొందొచ్చు. ముఖ్యంగా మలివయసులో సరైన ఆదాయ వనరులు లేనివారికి ఖర్చుల కోసం ఇది ఒక మంచి మార్గమని నిపుణులు చెబుతుంటారు. ఈ లోన్‌కి సంబంధించిన ఇతర కీలక విషయాలు తెలుసుకుందాం..

♦ 60 ఏళ్లు దాటిన సీనియర్‌ సిటిజన్స్‌ తమ సొంతింటిని తనఖా పెట్టి క్రమంతప్పని ఆదాయం పొందొచ్చు. పైగా ఇల్లు కూడా వారి పేరిటే ఉంటుంది.

♦ జీవితకాలంలో లోన్‌ తిరిగి చెల్లించాల్సిన అసవరం ఉండదు. బ్యాంకులు వడ్డీ కూడా వసులు చేయబోవు.

♦ నేషనల్‌ హౌసింగ్‌ బ్యాంక్‌ వద్ద నమోదైన ప్రైమరీ లెండింగ్‌ సంస్థలు- షెడ్యూల్డ్‌ బ్యాంకులు, హౌసింగ్‌ ఫైనాన్స్‌ కంపెనీలు రివర్స్‌ మార్టగేజ్‌ లోన్లను అందిస్తాయి.

♦ ఇంటి విలువ, లోన్‌తీసుకునేవారి వయసుపై లోన్‌ మంజూరు మొత్తం ఆధారపడి ఉంటుంది.

♦ లోన్‌ మొత్తాన్ని నెలవారీగా/మూడు నెలలకు/ఆరు నెలలకు లేదా ఒకేసారి ఏకమొత్తంలో తీసుకోవచ్చు.

♦ గరిష్ఠ రుణ కాలపరిమితి 20 ఏళ్లు. అంటే లోన్‌ తీసుకున్న దగ్గరి నుంచి వరుసగా 20 సంవత్సరాల పాటు మంజూరైన మొత్తాన్ని వాయిదాలుగా చెల్లిస్తారు.

♦ రుణ మొత్తాన్ని ఇంటి మరమ్మతులు, విస్తరణ, వైద్య ఖర్చుల కోసం ఉపయోగించుకోవచ్చు. అయితే, వ్యాపార అవసరాలకు మాత్రం ఈ సొమ్మును వాడుకోవద్దని నిబంధనలు చెబుతున్నాయి. కానీ, దీనిపై ఎలాంటి పర్యవేక్షణ ఉండదని నిపుణులు చెబుతున్నారు.

♦ ఇంటి విలువను రుణ సంస్థలు ఎప్పటికప్పుడు అంచనా వేస్తాయి. అందుకు అనుగుణంగా రుణ మంజూరులో మార్పులు చేస్తుంటాయి.

♦ లోన్‌ తీసుకున్నవారు జీవించి ఉన్నంత కాలం లేదా అక్కడి నుంచి వేరే ఇంటికి శాశ్వతంగా మారనంత కాలం తనఖా పెట్టిన ఇంటిని ఉపయోగించుకోవచ్చు.

♦ లోన్‌ పొందినవారు మరణించినా లేక అక్కడి నుంచి శాశ్వతంగా ఇతర ప్రాంతానికి తరలివెళ్లినా.. తనఖా పెట్టిన ఇంటిని అమ్మి బ్యాంకులు తమ రుణం, దానిపై వడ్డీని వసూలుచేసుకుంటాయి. ఒకవేళ ఏమైనా మిగిలితే చట్టపరమైన వారసులకు ఇచ్చేస్తాయి.

♦ కావాలంటే చట్టపరమైన వారసులు వడ్డీతో సహా లోన్ మొత్తాన్ని చెల్లించి ఇంటిని సొంతం చేసుకోవచ్చు.