Electric Vehicles: రూ.23 లక్షల కోట్లతో దేశంలో పూర్తిగా 2-3 వీలర్లు!

దిల్లీ: భారత్‌లో ద్విచక్ర, త్రిచక్ర వాహనాలన్నింటి స్థానంలో పూర్తిగా విద్యుత్తు వాహనాలను తీసుకురావాలంటే దాదాపు రూ.23 లక్షల కోట్లు అవసరమని ఓ నివేదిక తెలిపింది. దేశంలో డెలివరీ సంస్థలు వేగంగా విద్యుత్తు వాహనాలను వినియోగంలోకి తీసుకొస్తున్నాయని నీతి ఆయోగ్‌తో కలిసి ప్రపంచ ఆర్థిక వేదిక రూపొందించిన నివేదిక పేర్కొంది. తొలుత ద్విచక్ర, త్రిచక్ర వాహన విభాగాల్లోనే పూర్తిగా విద్యుత్తు వాహనాలు అందుబాటులోకి వస్తాయని అంచనా వేసింది.

యజమానులే డ్రైవర్లుగా ఉన్నవారు విద్యుత్తు వాహనాలపై అంతగా ఆసక్తి చూపడం లేదని నివేదిక తెలిపింది. కొనుగోలు ధరలు అధికంగా ఉండటం, కొత్త సాంకేతికతపై విశ్వాసం లేకపోవడం, కచ్చితమైన రీసేల్‌ విలువ తెలియకపోవడమే సవాళ్లుగా నిలుస్తున్నాయని పేర్కొంది. భారత్‌లో వాహన విక్రయాల్లో ద్విచక్ర, త్రిచక్ర వాహనాలదే 80 శాతం వాటా. గత కొన్నేళ్లుగా ఈ విభాగాల్లో విద్యుత్తు వాహనాల గిరాకీ క్రమంగా పుంజుకుంటోంది.

భారత్‌లో 45 కంపెనీలు విద్యుత్తు ద్విచక్ర, త్రిచక్ర వాహనాలను తయారు చేస్తున్నాయి. ఇప్పటివరకు దేశంలో ఈ విభాగాల్లో విద్యుత్తు వాహనాల సంఖ్య 10 లక్షలకు చేరింది. ప్రస్తుతం ఈ విభాగంలో దేశవ్యాప్తంగా అన్నీ కలిపి 25 కోట్ల వాహనాలున్నాయని అంచనా. వీటిని విద్యుత్తు వాహనాల్లోకి మార్చే నాటికి ఆ సంఖ్య 27 కోట్లకు చేరుతుందని నివేదిక పేర్కొంది. ఒక్కో ద్విచక్ర వాహన యూనిట్‌ ధరను సగటున రూ.81,000, త్రిచక్ర యూనిట్‌ ధర రూ.2.8 లక్షలుగా లెక్కేస్తే.. పూర్తిగా విద్యుత్తు వాహనాలను తీసుకురావడానికి రూ.23 లక్షల కోట్ల నిధులు అవసరమని అంచనా వేసింది.