Rupee value: ఇతర దేశాల కరెన్సీ కంటే మన రూపాయి మెరుగే: నిర్మలా సీతారామన్‌

పుణె: రూపాయి పతనంపై (Rupee) కేంద్ర ఆర్థిక మంత్రి నిర్మలా సీతారామన్‌ స్పందించారు. ఇతర దేశాల కరెన్సీతో పోలిస్తే అమెరికా డాలరుతో రూపాయి బాగానే రాణిస్తోందని చెప్పారు. డాలరుతో రూపాయి మారకం విలువ భారీగా పతనమైన నేపథ్యంలో ఇక్కడ ఆమె విలేకరులతో మాట్లాడారు. రిజర్వ్‌ బ్యాంక్‌, ఆర్థిక మంత్రిత్వ శాఖ ఎప్పటికప్పుడు పరిస్థితిని నిశితంగా గమనిస్తున్నాయని చెప్పారు. ఇతర కరెన్సీల్లా తీవ్రమైన ఒడుదొడుకులు, హెచ్చుతగ్గులకు గురికాలేదంటే అది భారత రూపాయేనని చెప్పారు. అమెరికా డాలర్‌తో పోలిస్తే మనం బాగా నిలబడ్డామన్నారు. రూపాయి విలువ ఎప్పుడూ లేనంతగా జీవిత కనిష్ఠానికి చేరిన సంగతి తెలిసిందే. ఈ నేపథ్యంలో దేశీయ కరెన్సీ విలువను కాపాడేందుకు ఆర్‌బీఐ ఫారెక్స్‌ నిల్వలను విక్రయించొచ్చన్న అంచనాలున్నాయి.