SBI Q4 Results: ఎస్‌బీఐ క్యూ4 లాభంలో 83 శాతం వృద్ధి

దిల్లీ: ప్రభుత్వరంగ అతిపెద్ద బ్యాంక్‌ స్టేట్‌ బ్యాంక్‌ ఆఫ్‌ ఇండియా (SBI) 2022-23 ఆర్థిక సంవత్సరం చివరి త్రైమాసిక ఫలితాలను (Q4 results) ప్రకటించింది. మార్చితో ముగిసిన త్రైమాసికంలో రూ.16,694.51 కోట్ల నికర లాభాన్ని నమోదు చేసింది. అంతకుముందు ఏడాదితో పోలిస్తే ఈ మొత్తం 83 శాతం పెరిగింది. 2021-22 జనవరి-మార్చి త్రైమాసికంలో ఎస్‌బీఐ రూ.9,113.53 కోట్ల నికర లాభాన్ని ప్రకటించింది. వడ్డీ ఆదాయం పెరగడం, మొండి బాకీలు తగ్గడంతో ఎస్‌బీఐ భారీ లాభాలు నమోదు చేసింది.

మార్చితో ముగిసిన త్రైమాసికంలో బ్యాంక్‌కు వడ్డీ రూపంలో రూ.92,951 కోట్ల ఆదాయం వచ్చింది. అంతకుముందు ఏడాదితో పోలిస్తే ఇది 31 శాతం అధికం. మొండి బకాయిలు ఇతరత్రాలకు కేటాయింపులు 2021-22 జనవరి-మార్చి త్రైమాసికంలో రూ.7,237.45 కోట్లు ఉండగా.. ఆ మొత్తం ఈ సారి రూ.3,315.71 కోట్లకు తగ్గింది. ఇక మొత్తం ఏడాదికి గానూ నికర లాభం 59 శాతం వృద్ధితో రూ.50,232.45 కోట్లు నమోదు చేసింది. అలాగే డివిడెండ్‌ను కూడా ప్రకటించింది. 2022-23 ఆర్థిక సంవత్సరానికి గానూ ఒక్కో ఈక్విటీ షేరుపై రూ. 11.30 చొప్పున డివిడెండ్‌ చెల్లించేందుకు నిర్ణయించింది. జూన్‌ 14న చెల్లింపులు చేయనుంది.