Stock market: ఆద్యంతం నష్టాల్లో దేశీయ సూచీలు

ముంబయి: దేశీయ స్టాక్‌ మార్కెట్‌ సూచీలు మరోసారి నష్టాల్లో ముగిశాయి. ఫెడరల్‌ రిజర్వ్‌ వడ్డీరేట్ల పెంపు మరికొంతకాలం కొనసాగించనుందనే అంచనాలతో యూఎస్‌ సూచీలు నిన్నటి ట్రేడింగ్‌ సెషన్‌లో నష్టాల్లో ముగిశాయి. దాని ప్రభావం అంతర్జాతీయ మార్కెట్లతో పాటు మన మార్కెట్లపైనా పడింది. క్రూడాయిల్‌ ధరల పెరుగుదల ప్రభావం చూపింది. మరోవైపు బుధవారం ఆర్‌బీఐ పరపతి విధాన సమీక్ష నిర్ణయాలు వెలువడనుండడంతో మదుపరులు అప్రమత్తత పాటించారు. ముఖ్యంగా మెటల్‌, ఐటీ షేర్లలో అమ్మకాల ఒత్తిడి కనిపించింది. దీంతో సెన్సెక్స్‌ వరుసగా మూడో రోజూ నష్టాల్లో ముగిసింది. డాలరుతో రూపాయి మారకం విలువ 82 పైసలు క్షీణించి 82.61 వద్ద స్థిరపడింది.
 
ఉదయం 62,395 వద్ద నష్టాలతో ప్రారంభమైన సెన్సెక్స్‌.. రోజంతా నష్టాల్లోనే కొనసాగింది. ఓ దశలో 400 పాయింట్లకు పైగా నష్టాలోకి వెళ్లిన సూచీ చివరికి 208.24 పాయింట్ల నష్టంతో 62,626.36 వద్ద స్థిరపడింది. నిఫ్టీ సైతం 58.20 పాయింట్ల నష్టంతో 18,642.80 వద్ద ముగిసింది. సెన్సెక్స్‌లో టాటా స్టీల్‌, డాక్టర్‌ రెడ్డీస్‌, ఇన్ఫోసిస్‌, ఎస్‌బీఐ, భారతీ ఎయిర్‌టెల్‌, ఐసీఐసీఐ బ్యాంక్‌ షేర్లు నష్టాల్లో ముగిశాయి. హిందుస్థాన్‌ యూనిలీవర్‌, అల్ట్రాటెక్‌ సిమెంట్‌, పవర్‌గ్రిడ్‌, నెస్లే యాక్సిస్‌ బ్యాంక్‌ షేర్లు స్వల్పంగా లాభపడ్డాయి. బీఎస్‌ఈ మిడ్‌క్యాప్‌, స్మాల్‌క్యాప్‌ సూచీలు నష్టాల్లో ముగిశాయి.