Stock Market: లాభాలతో ప్రారంభమైన దేశీయ స్టాక్‌ మార్కెట్‌ సూచీలు

Stock Market: దేశీయ స్టాక్‌ మార్కెట్‌ సూచీలు గురువారం లాభాలతో ప్రారంభమయ్యాయి. 

Published : 06 Oct 2022 09:42 IST

ముంబయి: దేశీయ స్టాక్‌ మార్కెట్‌ సూచీలు గురువారం లాభాలతో ప్రారంభమయ్యాయి. అమెరికా మార్కెట్లు బుధవారం స్వల్ప నష్టాలతో ముగిశాయి. నేడు ఆసియా-పసిఫిక్‌ సూచీలు మిశ్రమంగా ట్రేడవుతున్నాయి. ప్రస్తుతం యూఎస్‌ ఈక్విటీ ఫ్యూచర్స్‌ లాభాల్లో ఉన్నాయి. నవంబరులో చమురు ఉత్పత్తిని 2 మిలియన్‌ బ్యారెళ్లు తగ్గించాలని బుధవారం సమావేశమైన ఒపెక్‌+ కూటమి నిర్ణయించింది. దీంతో బ్యారెల్‌ బ్రెంట్‌ చమురు ధర 93 డాలర్లకు పెరిగింది.

ఈ పరిణామాల మధ్య ఉదయం 9:24 గంటల సమయానికి సెన్సెక్స్‌ 299 పాయింట్ల లాభంతో 58,365 వద్ద ట్రేడవుతోంది. నిఫ్టీ 92 పాయింట్లు లాభపడి 17,367 వద్ద కొనసాగుతోంది. డాలరుతో పోలిస్తే రూపాయి మారకం విలువ రూ.81.61 వద్ద ట్రేడవుతోంది. సెన్సెక్స్‌ 30 సూచీలో బజాజ్‌ ఫైనాన్స్‌, హెచ్‌డీఎఫ్‌సీ, హెచ్‌యూఎల్‌, కొటాక్‌ మహీంద్రా బ్యాంక్‌, హెచ్‌డీఎఫ్‌సీ బ్యాంక్‌ షేర్లు నష్టాల్లో ఉన్నాయి. హెచ్‌సీఎల్‌ టెక్‌, ఎల్అండ్‌టీ, సన్‌ఫార్మా, టాటా స్టీల్‌, ఇన్ఫోసిస్‌, ఎన్‌టీపీసీ, ఐసీఐసీఐ బ్యాంక్‌, ఎస్‌బీఐ, పవర్‌గ్రిడ్‌, టెక్‌ మహీంద్రా, అల్ట్రాటెక్‌ సిమెంట్స్‌, టైటన్‌ షేర్లు లాభాల్లో ఉన్నాయి.

నేడు గమనించాల్సిన స్టాక్స్‌...

జేఎస్‌డబ్ల్యూ ఎనర్జీ: అనుబంధ సంస్థ జేఎస్‌డబ్ల్యూ నియో ఎనర్జీ మహారాష్ట్రలో 960 మెగావాట్ల సామర్థ్యంతో కూడిన హైడ్రో ‘పంప్డ్‌ స్టోరేజ్‌ ప్రాజెక్ట్‌ (PSP)’ను ఏర్పాటు చేయనుంది. ఈ మేరకు ఆ రాష్ట్ర ప్రభుత్వంతో అవగాహనా ఒప్పందం కుదుర్చుకొంది.

అతుల్‌ ఆటో: రైట్స్‌ లేదా ప్రిఫరెన్షియల్‌ ఇష్యూ ద్వారా నిధులు సమీకరించాలని అతుల్‌ ఆటో యోచిస్తోంది. దీనిపై తుది నిర్ణయం తీసుకునేందుకు అక్టోబరు 8న కంపెనీ బోర్డ్‌ ఆఫ్‌ డైరెక్టర్స్‌ సమావేశం కానున్నారు.

స్టెరిలైట్‌ టెక్నాలజీస్‌: యూకే కేంద్రంగా పనిచేస్తున్న ‘ఇంపాక్ట్‌ డేటా సొల్యూషన్స్‌’ నుంచి స్టెరిలైట్‌ టెక్‌ తమ వాటాలను పూర్తిగా ఉపసంహరించుకుంది.

టాటా స్టీల్‌: ఒమన్‌ కేంద్రంగా పనిచేస్తున్న ‘అల్‌ రిమల్‌’లో టాటా స్టీల్‌ అనుబంధ సంస్థ టీఎస్‌ గ్లోబల్‌ హోల్డింగ్స్‌ తమ వాటాల్లో 19 శాతం తన్మియాకు విక్రయించింది. దీంతో అల్‌ రిమల్‌లో టాటా స్టీల్‌ వాటా 70 శాతం నుంచి 51 శాతానికి తగ్గింది.

జుబిలంట్‌ ఫుడ్‌వర్క్స్‌: నెదర్లాండ్స్‌ కేంద్రంగా పనిచేస్తున్న ‘డీపీ యురేషియా ఎన్‌వీ’లో జుబిలంట్‌ ఫుడ్‌వర్క్స్‌ అదనపు వాటాలను కొనుగోలు చేసింది.

Read latest Business News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts