Social media influencers: 70% మంది వారు బలపర్చినవే కొంటారట!

దిల్లీ: భారత్‌లో ప్రతి పది మందిలో ఏడుగురు.. సోషల్‌ మీడియా ఇన్‌ప్లుయెన్సర్లు బలపర్చిన ఉత్పత్తులను కొనుగోలు చేసేందుకే ఇష్టపడుతున్నారని యాస్కీ సర్వే తెలిపింది. 18 ఏళ్లు దాటిన మొత్తం 820 మందిని సర్వే చేసి ‘అడ్వర్టైజింగ్‌ స్టాండర్డ్స్‌ కౌన్సిల్‌ ఆఫ్ ఇండియా (ASCI)’ ఈ విషయాన్ని వెల్లడించింది.  ఫేస్‌బుక్‌, ఇన్‌స్టా, యూట్యూబ్‌ వంటి సోషల్ మీడియా వేదికల్లో ఆదరణ పొందుతున్న వారు వీక్షకుల కొనుగోలు అభిరుచులను ఎలా ప్రభావితం చేస్తున్నారో ఈ సర్వే తెలియజేస్తోంది.

ఇన్‌ఫ్లుయెన్సర్లు ఎండార్స్‌ చేసిన ఉత్పత్తుల్లో ఇప్పటి వరకు కనీసం ఒకటైనా కొనుగోలు చేసినట్లు సర్వేలో పాల్గొన్నవారిలో 90 శాతం మంది తెలిపారు. 61 శాతం మంది మూడు కంటే ఎక్కువ ఉత్పత్తులు కొన్నట్లు పేర్కొన్నారు. 25 నుంచి 44 ఏళ్ల మధ్య వయసు వారిపై సోషల్‌ మీడియా ఇన్‌ఫ్లుయెన్సర్ల ప్రభావం అధికంగా ఉన్నట్లు సర్వేలో తేలింది. ప్రత్యేక బ్రాండ్‌తో ఆయా ఇన్‌ప్లుయెన్సర్లకు ఉన్న అనుభవం ఆధారంగానే వారిపై వీక్షకులు వారిపై విశ్వాసాన్ని పెంచుకుంటున్నారని తెలిసింది. ఈ విషయంలో పారదర్శకంగా లేకుండా తప్పుడు సమాచారాన్ని అందించేవారిని వీక్షకులు తిరస్కరిస్తున్నట్లు సర్వే తేల్చింది.

బ్రాండ్లు, ఇన్‌ఫ్లుయెన్సర్లపై ఇప్పటి వరకు 2,767 ఫిర్యాదులు అందినట్లు యాస్కీ తెలిపింది. ఇరుపక్షాలు వారి మధ్య ఉన్న అనుబంధాన్ని వెల్లడించకపోవడమే దీనికి కారణమని పేర్కొంది. బ్రాండ్లు, ఇన్‌ఫ్లుయెన్సర్లు వారి మధ్య ఉన్న అనుబంధాలను బహిర్గతం చేయాలని యాస్కీ 2021 మే నెలలో మార్గదర్శకాలు జారీ చేసింది. పర్సనల్‌ కేర్‌ విభాగంలో అత్యధిక ఫిర్యాదులు అందినట్లు తెలిపింది. అలాగే ఇన్‌స్టాలో ఉల్లంఘనలు అధికంగా ఉన్నట్లు పేర్కొంది.