OYO offer: ఓయోలో రూమ్స్‌పై 60 శాతం వరకు డిస్కౌంట్‌.. కేవలం వారికి మాత్రమే!

దిల్లీ: ఆతిథ్య సేవలు అందించే ఓయో సంస్థ (OYO Rooms) కొత్త ఆఫర్‌తో ముందుకొచ్చింది. తమ హోటళ్లలో చిరు వ్యాపారులకు 60 శాతం వరకు డిస్కౌంట్‌ అందించనున్నట్లు ప్రకటించింది. ఈ నెల 27న ఎంఎస్‌ఎంఈ దినోత్సవాన్ని పురస్కరించుకుని చిన్న, మధ్యతరగతి వ్యాపారుల కోసం ఈ పరిమిత కాలపు స్కీమ్‌ తీసుకొచ్చినట్లు ఓయో ఓ ప్రకటనలో పేర్కొంది. ఈ నెల 27 నుంచి జులై 3 వరకు ఈ ఆఫర్‌ వర్తిస్తుందని తెలిపింది.

ఓయో కస్టమర్లలో ఎక్కువ మంది చిన్న, మధ్యతరగతి వ్యాపారానికి సంబంధించిన యజమానులు, ఉద్యోగులే ఉంటున్నారని ఓయో తెలిపింది. అందుకే ఎంఎస్‌ఎంఈ దినోత్సవాన్ని పురస్కరించుకుని వారిని మరింత ప్రోత్సహించడంతో పాటు గౌరవించాలన్న ఉద్దేశంతోనే ఈ ఆఫర్‌ను ప్రకటించినట్లు పేర్కొంది. ఆ ఆఫర్‌ సమయంలో దేశవ్యాప్తంగా 2 వేల ఓయో ప్రాపర్టీల్లో అందుబాటులో ఉన్న 10వేల గదులను బుక్‌ డిస్కౌంట్‌లో బుక్‌ చేసుకోవచ్చని ఓయో సీనియర్‌ వైస్‌ ప్రెసిడెంట్‌ శ్రీరంగ్‌ తెలిపారు. ఓయో యాప్‌, వెబ్‌సైట్‌, ఆన్‌లైన్‌ ట్రావెల్‌ ప్లాట్‌ఫాంల ద్వారా ఈ ఆఫర్‌ను పొందొచ్చని పేర్కొన్నారు. చెక్‌-ఇన్‌ సమయంలో తమ బిజినెస్‌ కార్డును చూపించాల్సి ఉంటుందని వెల్లడించారు.