Stock Market: మార్కెట్లకు భారీ లాభాలు.. నిఫ్టీ @ 17,850

Stock Market: సెన్సెక్స్‌ 900 పాయింట్లు, నిఫ్టీ 240 పాయింట్లకు పైగా లాభపడింది.

Published : 03 Feb 2023 16:05 IST

ముంబయి: దేశీయ స్టాక్‌ మార్కెట్‌ (Stock Market) సూచీలు శుక్రవారం భారీ లాభాల్లో దూసుకెళ్లాయి. ఉదయం ఉత్సాహంగా ప్రారంభమైన మార్కెట్లు మధ్యాహ్నం తర్వాత మరింత జోరందుకున్నాయి. అదానీ గ్రూప్ (Adani Group) స్టాక్స్‌కు సంబంధించి వెలువడిన కొన్ని సానుకూల సంకేతాలు మదుపర్లలో విశ్వాసం నింపాయి. ముందస్తు రుణ చెల్లింపులు, సకాలంలో బాండ్ల కూపన్‌ చెల్లింపుల వంటి పరిణామాలు సానుకూలతలు నింపాయి. 

ఈ పరిణామాలతో ఓ దశలో దాదాపు 30 శాతం నష్టపోయిన అదానీ ఎంటర్‌ప్రైజెస్‌ (Adani Enterprises) షేరు భారీగా కోలుకొని చివరకు 2 శాతం నష్టాలతో సరిపెట్టుకుంది. ఈ స్టాక్‌ ఓ దశలో లాభాల్లోకి ఎగబాకడం గమనార్హం. అదానీ పోర్ట్స్‌ అండ్‌ సెజ్‌ సైతం 6.51 శాతం లాభపడింది. మిగిలిన అదానీ నమోదిత కంపెనీలు మాత్రం నష్టాల్లోనే ముగిశాయి. బ్యాంకులపై అదానీ స్టాక్స్ పతనం ప్రభావం పెద్దగా ఉండకపోవచ్చునన్న ప్రభుత్వ ప్రకటన కూడా మార్కెట్లకు కలిసొచ్చింది.

ఉదయం సెన్సెక్స్‌ (Sensex) 60,350.01 వద్ద లాభాలతో ప్రారంభమైంది. ఇంట్రాడేలో 60,905.34- 60,013.06 మధ్య కదలాడింది. చివరకు 909.64 పాయింట్ల లాభంతో 60,841.88 దగ్గర స్థిరపడింది. నిఫ్టీ (Nifty) 17,721.75 వద్ద ట్రేడింగ్‌ ప్రారంభించి ఇంట్రాడేలో 17,870.30- 17,584.20 మధ్య ట్రేడయ్యింది. చివరకు 243.65 పాయింట్ల లాభంతో 17,854.05 వద్ద ముగిసింది. మార్కెట్లు ముగిసే సమయానికి డాలర్‌తో పోలిస్తే రూపాయి మారకం విలువ 81.82 వద్ద నిలిచింది.

సెన్సెక్స్‌ (Sensex)30 సూచీలో 03 షేర్లు మాత్రమే నష్టపోయాయి. హెచ్‌సీఎల్‌ టెక్‌, విప్రో, టెక్‌ మహీంద్రా షేర్లు నష్టపోయిన జాబితాలో ఉన్నాయి. టైటాన్‌, బజాజ్‌ ఫిన్‌సర్వ్‌, బజాజ్‌ ఫైనాన్స్‌, హెచ్‌డీఎఫ్‌సీ బ్యాంక్‌, హెచ్‌డీఎఫ్‌సీ, ఎస్‌బీఐ, ఎంఅండ్‌ఎం, ఇండస్‌ఇండ్‌ బ్యాంక్‌, ఏషియన్‌ పెయింట్స్‌, భారతీ ఎయిర్‌టెల్‌ షేర్లు లాభపడ్డాయి.

మార్కెట్‌లోని ఇతర సంగతులు..

జైడస్‌ లైఫ్‌సైన్సెస్‌ మూడో త్రైమాసిక ఫలితాలు ఈరోజు విడుదలయ్యాయి. కంపెనీ నికర లాభం 24.48 శాతం పెరిగింది. కంపెనీ షేరు ఈరోజు 0.44 శాతం పెరిగి రూ. 434.75 వద్ద స్థిరపడింది.

దివీస్‌ ల్యాబ్స్‌ త్రైమాసిక ఫలితాలు మదుపర్లను నిరాశపర్చాయి. కంపెనీ షేరు ఈరోజు 12 శాతానికి పైగా కుంగి రూ.2,875 వద్ద ముగిసింది.

డిసెంబరుతో ముగిసిన త్రైమాసికంలో టైటాన్‌ కంపెనీ నికర లాభం 4 శాతం తగ్గింది. దీంతో కంపెనీ షేరు ఈరోజు 1.07 శాతం నష్టపోయి రూ.2,321.95 వద్ద స్థిరపడింది.

★ మూడో త్రైమాసికంలో జుబిలంట్‌ ఫుడ్‌వర్క్స్‌ ఆదాయ, వ్యయాల్లో రెండంకెల క్షీణత నమోదైన నేపథ్యంలో కంపెనీ షేరు గత రెండు సెషన్లలో 11 శాతానికి పైగా నష్టపోయింది. ఈరోజు షేరు ధర 1.12 శాతం నష్టపోయి రూ.430.70 వద్ద స్థిరపడింది.


Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

సుఖీభవ

చదువు