రుణం తీసుకోండి... నైపుణ్యం పెంచుకోండి!

నైపుణ్యాల‌ను అభివృద్ధి చేసుకోవాల‌ని ఆశించే వారి కోసం బ్యాంకులు అందించే రుణాల‌పై స‌మ‌గ్ర వివ‌ర‌ణ‌

వివిధ రంగాల్లో ప‌నిచేసే వారు త‌మ త‌మ నైపుణ్యాల‌ను అభివృద్ధి ప‌రుచుకునేందుకు భార‌త ప్ర‌భుత్వం ఓ చ‌క్క‌ని అవ‌కాశం క‌ల్పిస్తోంది. అదే నైపుణ్యాభివృద్ధి ప‌థ‌కం. దీని ప్ర‌కారం అర్హ‌త ఉన్న అభ్య‌ర్థులు రుణం పొందేందుకు వీలుంటుంది. ఆర్‌బీఐ సూచించిన బ్యాంకులు ఈ రుణాన్ని మంజూరు చేస్తాయి.

అర్హ‌త‌:
పారిశ్రామిక శిక్ష‌ణా కేంద్రాలు, పాలిటెక్నిక్ సంస్థ‌లు, కేంద్ర‌, రాష్ట్ర ప్ర‌భుత్వాల ఎడ్యుకేష‌న్ బోర్డుల గుర్తింపు పొందిన శిక్ష‌ణా సంస్థ‌లు,కేంద్ర నైపుణ్యాభివృద్ది కార్పొరేష‌న్‌తో భాగ‌స్వామ్యం క‌లిగిన శిక్ష‌ణా కేంద్రాలలో శిక్ష‌ణ పొందుతున్న అభ్య‌ర్థులు ఈ రుణం పొందేందుకు అర్హులు.

రుణ ప‌రిధిలోకి వ‌చ్చే ఖ‌ర్చులు:
* ట్యూష‌న్ / కోర్సు ఫీజు
* ప‌రీక్ష రుసుము, గ్రంథాల‌య రుసుము, ప్ర‌యోగ‌శాల రుసుము, కాష‌న్ డిపాజిట్‌, పుస్త‌కాల ఖ‌ర్చులు,
* ప‌రిస్థితుల‌ను బ‌ట్టి వ‌స‌తి కోసం అయ్యే ఖ‌ర్చులు
* కోర్సుకు అవ‌స‌ర‌మయ్యే ఇత‌ర వ‌స్తువుల ఖ‌ర్చులు
రుణ మొత్తం:
రూ. ఐదు వేల నుంచి మొద‌లుకొని రూ. ల‌క్షా యాభై వేల వ‌ర‌కూ ఈ ప‌థ‌కం కింద రుణం మంజూరు చేస్తారు. ఈ త‌ర‌హా రుణాల‌పై ఎటువంటి మార్జిన్ ఉండ‌దు.  అంటే మొత్తం రుణాన్ని బ్యాంకే మంజూరు చేస్తుంది. ఈ రుణాల‌కు ఎటువంటి పూచీక‌త్తు అవ‌స‌రం లేదు.

వ‌డ్డీ,  ఇత‌ర రుసుములు:
బ్యాంకులను బ‌ట్టి రుణాల‌పై వ‌సూలు చేసే వ‌డ్డీ రేట్ల‌లో స్వ‌ల్ప మార్పులు ఉండ‌వ‌చ్చు. ప్ర‌స్తుతానికి వ‌డ్డీ రేట్లు 11-12 శాతం మ‌ధ్య‌లో ఉన్నాయి. ఈ రుణానికి ఎటువంటి ప్రాసెసింగ్ ఫీజు వ‌సూలు చేయ‌రు.

రుణ తిరిగి చెల్లింపు:
రుణాల‌ను తిరిగి చెల్లించేందుకు రుణ‌గ్ర‌హీత‌ల‌కు త‌గినంత గ‌డువు ఇస్తారు. సంవ‌త్స‌రం లోపు కోర్సుల‌కు - కోర్సు పూర్తి చేసిన 6 నెల‌ల వ‌ర‌కూ,  సంవ‌త్స‌రం పైబ‌డిన కోర్సుల‌కు - కోర్సు పూర్తి చేసిన 12 నెల‌ల మార‌టోరియం పీరియ‌డ్ ఉంటుంది. ఈ కాలంలో సాధార‌ణ వ‌డ్డీ వ‌సూలు చేస్తారు. రుణ మొత్తాన్ని బ‌ట్టి చెల్లింపు గ‌డువును నిర్ణ‌యిస్తారు.

* రూ. 50 వేల వ‌ర‌కూ - 3 సంవ‌త్స‌రాలు
* రూ. 50 వేల నుంచి రూ. ల‌క్ష వ‌ర‌కూ - 5 సంవ‌త్స‌రాలు
* రూ. ల‌క్ష పైన - 7 సంవ‌త్స‌రాలు
ముంద‌స్తు చెల్లింపు:
రుణ గ్ర‌హీత ఎటువంటి ముంద‌స్తు రుసుములు లేకుండా రుణాన్ని తిరిగి చెల్లించ‌వ‌చ్చు. ప్ర‌మాదం / మ‌ర‌ణం  / వైక‌ల్యం కార‌ణంగా విద్యార్థి కోర్సు పూర్తిచేయ‌లేకపోతే శిక్ష‌ణా సంస్థ నుంచి మిగిలిన శిక్ష‌ణా కాలానికి సంబంధించిన సొమ్మును ప్రొరేటా రీయింబ‌ర్స్‌మెంట్ ప‌ద్ద‌తిలో వెన‌క్కి తీసుకునేందుకు ప్ర‌య‌త్నించ‌వ‌చ్చు.

అర్హ‌త క‌లిగిన అభ్య‌ర్థుల‌కు ప‌రిమితి మేర‌కు రుణాన్ని బ్యాంకులు మంజూరు చేస్తాయి. ఈ రుణంతో నైపుణ్యాన్ని అభివృద్ది ప‌రుచుకొని స‌రైన ఉపాధిని పొంద‌వ‌చ్చు. కోర్సు ద్వారా స్వ‌యం ఉపాధి  / ఉద్యోగం పొందిన విద్యార్థులు వీలైనంత త్వ‌ర‌గా రుణాన్ని తీర్చివేస్తే మంచిది.