Ashwini Vaishnaw: టెలికాం శాఖలో 10 మంది సీనియర్‌ అధికారులపై అశ్వినీ వైష్ణవ్‌ వేటు

దిల్లీ: విధుల పట్ల అలసత్వం ప్రదర్శిస్తూ పనితీరు సరిగా కనబరచని అధికారులపై టెలికాం మంత్రి అశ్వినీ వైష్ణవ్‌ (Ashwini Vaishnaw) వేటు వేశారు. టెలికాం విభాగంలో (DoT officers) పనిచేస్తున్న 10 మంది సీనియర్‌ అధికారులను బలవంతపు రిటైర్మెంట్‌పై పంపించారని విశ్వసనీయ వర్గాలు తెలిపాయి. ఇందులో జాయింట్‌ సెక్రటరీ స్థాయి ఉద్యోగి కూడా ఉన్నారని పేర్కొన్నాయి. మిగిలిన తొమ్మిది మంది డైరెక్టర్‌ స్థాయి అధికారులు అని తెలిసింది. విధుల్లో అవినీతి, చిత్తశుద్ధిపై అనుమానంతో వీరిని విధుల నుంచి తప్పించేందుకు మంత్రి ఆమోదం తెలిపారని సమాచారం.

పెన్షన్‌ నిబంధనలను అనుసరించి టెలికాం విభాగంలో ఒక ఉద్యోగిని ఇలా బలవంతంగా పదవీ విరమణపై పంపడం ఇదే తొలిసారి కావడం గమనార్హం. అంతకుముందు సెప్టెంబర్‌లో ఇలానే మంత్రి వైష్ణవ్‌ నిర్వహించిన సమావేశంలో బీఎస్‌ఎన్‌ఎల్‌కు చెందిన ఓ సీనియర్‌ అధికారి నిద్రపోవడంతో ఆయన చేత స్వచ్ఛంద పదవీ విరమణ చేయించారు. వైష్ణవ్‌ నిర్వహిస్తున్న రైల్వే శాఖలో సైతం ఇప్పటికే 40 మంది ఉద్యోగుల్ని ఇలానే ఇంటికి పంపించారు. పనితీరు సరిగాలేని, చిత్తశుద్ధి కనబరచని ఉద్యోగుల చేత బలవంతపు రిటైర్మెంట్‌ చేయించారు. వీరిలో సెక్రటరీ స్థాయి అధికారితో పాటు ఇద్దరు స్పెషల్‌ సెక్రటరీ అధికారులు ఉన్నారు.