Updated : 29 Jul 2022 14:54 IST

5G auction: చిన్న సర్కిల్‌ కోసం గట్టి పోటీ.. 4వ రోజూ కొనసాగుతున్న వేలం!

దిల్లీ: వేగవంతమైన ఇంటర్నెట్‌ సేవలకు కావాల్సిన 5జీ స్పెక్ట్రమ్‌ కోసం జరుగుతోన్న వేలం వరుసగా నాలుగోరోజైన శుక్రవారమూ ప్రారంభమైంది. ఓ సర్కిల్‌లోని నిర్దేశిత ప్రాంతంలో బ్యాండ్‌ కోసం గురువారం సంస్థలు పోటీపడ్డాయి. అది ఏ మెట్రోనగరాలో లేక కేటగిరీ-ఏ సర్కిలో అనుకుంటే పొరపాటే. ‘బీ’ కేటగిరీ సర్కిల్‌ జాబితాలో ఉన్న ‘ఉత్తర్‌ప్రదేశ్‌ తూర్పు’ ప్రాంతంలో.. అదీ 4జీ స్పెక్ట్రమ్‌లోని 1,800 మెగా హెర్ట్జ్స్‌ బ్యాండ్‌ కోసం టెలికాం కంపెనీల మధ్య తీవ్ర పోటీ నెలకొంది. ఈ క్రమంలోనే సంస్థలు పోటాపోటీగా బిడ్లు దాఖలు చేయడంతో వేలం నాలుగో రోజుకు చేరింది.

బిడ్ల విలువపరంగా చూస్తే.. గత రెండు రోజుల్లో పెద్దగా పెరిగిందేమీ లేదు. వేలం ప్రారంభమైన మంగళవారం రూ.1.45 లక్షల కోట్ల బిడ్లు దాఖలు కాగా.. బుధవారానికి అది రూ.1,49,454 కోట్లకు పెరిగింది. గురువారం మరో రూ.169 కోట్ల బిడ్లు దాఖలు కావడంతో రూ.1,49,623 కోట్లకు చేరింది. ఇతర బ్యాండ్లకు పోటీ స్థిరంగా ఉండగా.. యూపీ ఉత్తర ప్రాంతంలో 1,800 మెగా హెర్ట్జ్స్‌ బ్యాండ్‌ కోసం దాఖలవుతున్న బిడ్ల విలువ మాత్రం పెరుగుతూ పోతోందని ఈ వ్యవహారంతో సంబంధం ఉన్న వర్గాలు తెలిపాయి.

ప్రత్యేకంగా యూపీ ఉత్తర ప్రాంతంలో బ్యాండ్ కోసం పోటీపడడానికి ఓ కారణం ఉంది. ఆ ప్రాంతంలో దాదాపు 14.5 కోట్ల జనాభా ఉంది. వీరిలో 9 కోట్ల సబ్‌స్క్రైబర్లు ఉన్నారు. అత్యధికంగా ఎయిర్‌టెల్‌కు 3.74 కోట్లు, రిలయన్స్‌ జియోకు 3.29 కోట్లు, వొడాఫోన్ ఐడియాకు 2.03 కోట్ల సబ్‌స్క్రైబర్లు ఉన్నారు. గురువారం అత్యధికంగా ఏడు రౌండ్ల వేలం జరిగింది. శుక్రవారం 17వ రౌండ్‌ నుంచి వేలం కొనసాగుతోంది. వేలం సుదీర్ఘంగా కొనసాగడం ఆరోగ్యకరమైన పోటీకి నిదర్శనమని కేంద్ర సమాచార, సాంకేతిక వ్యవహారాల శాఖ మంత్రి అశ్వినీ వైష్ణవ్‌ అన్నారు.

Read latest Business News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని