Millionaires: ప్రపంచంలో అత్యధిక మిలియనీర్లు ఉన్న నగరాలివే..!

వాషింగ్టన్‌: అత్యధిక మిలియనీర్లు కలిగిన నగరాల జాబితాలో న్యూయార్క్‌, టోక్యో, శాన్‌ఫ్రాన్సిస్కో బే ఏరియా తొలి మూడు స్థానాల్లో ఉన్నట్లు ‘హెన్లీ అండ్‌ పార్ట్‌నర్స్‌ గ్రూప్‌’ నివేదిక తెలిపింది. ఈ జాబితాలో తొలి పది స్థానాల్లో సగం అమెరికాకు చెందిన నగరాలే ఉన్నట్లు పేర్కొంది. కనీసం 1 మిలియన్‌ డాలర్ల మదుపు చేయగల ఆస్తులు ఉన్న వ్యక్తుల్ని నివేదిక మిలియనీర్లుగా లెక్కగట్టింది.

అయితే, 2022 తొలి అర్ధభాగంలో న్యూయార్క్‌ నగరంలో ధనవంతుల సంఖ్య 12 శాతం తగ్గినట్లు నివేదిక వెల్లడించింది. అదే సమయంలో శాన్‌ఫ్రాన్సిస్కో బే ఏరియాలో ‘హై నెట్‌-వర్త్‌ ఇండివిడ్యువల్స్‌ (HNI)’ సంఖ్య 4 శాతం పెరగడం గమనార్హం. అత్యధిక మిలియనీర్లు కలిగిన నగరాల జాబితాలో నాలుగో స్థానంలో లండన్‌ నిలిచింది.  2022 తొలి ఆరు నెలల్లో ఈ నగరంలో హెచ్‌ఎన్‌ఐల సంఖ్య 9 శాతం తగ్గింది.

సౌదీ అరేబియా రాజధాని రియాద్‌, యూఏఈలోని షార్జా నగరాల్లో మిలియనీర్ల సంఖ్య అత్యంత వేగంగా పెరుగుతున్నట్లు నివేదిక తెలిపింది. ఈ వరుసలో అబుదాబి, దుబాయ్‌ కూడా ఉన్నాయి. తక్కువ పన్నులు, కొత్త నివాస విధానాలతో యూఏఈ సంపన్నులను ఆకర్షిస్తోందని పేర్కొంది. రష్యా నుంచి ధనవంతులు యూఏఈకి భారీ ఎత్తున తరలి వస్తుండడంతో ఆ దేశ నగరాల్లో శ్రీమంతుల సంఖ్య పెరుగుతోందని తెలిపింది. ఈ జాబితాలో చైనాకు చెందిన బీజింగ్‌, షాంఘై వరుసగా తొమ్మిది, పది స్థానాల్లో ఉన్నాయి. రష్యా తర్వాత చైనా నుంచే అత్యధిక మంది ధనవంతులు వలస వెళ్లే అవకాశముందని నివేదిక అంచనా వేసింది.