ఈ విమానాల్లో ఇక పెంపుడు జంతువులనూ తీసుకెళ్లొచ్చు..!

ఇంటర్నెట్‌ డెస్క్: కొత్తగా విమానయాన రంగంలోకి అడుగుపెట్టిన ఆకాశ ఎయిర్‌ (Akasa Air) తమ ప్రయాణికులకు కొత్త సదుపాయం తీసుకొస్తోంది. ఇకపై దేశీయ విమానాల్లో పిల్లులు, కుక్కలు వంటి పెంపుడు జంతవులనూ (pets) తమ వెంట తీసుకెళ్లొచ్చని తెలిపింది. నవంబర్‌ నుంచి ఈ సదుపాయం అందుబాటులోకి తెస్తున్నట్లు ఆ కంపెనీ సీఈఓ వినయ్‌ దూబె తెలిపారు. ఈ ప్రయాణానికి  15 నుంచి బుకింగ్స్‌ ప్రారంభిస్తామని కంపెనీ వర్గాలు తెలిపాయి.

ఆగస్టు 7న ఆకాశ ఎయిర్‌ సేవలు దేశీయంగా ప్రారంభయ్యాయి. ప్రస్తుతం ఆరు విమానాలు నడుస్తున్నాయి. వచ్చే ఏడాది మార్చి నాటికి ఈ సంఖ్యను 18కి చేరుతుందని కంపెనీ చెబుతోంది. సేవలు ప్రారంభమై నేటికి 60 రోజులు పూర్తయిన నేపథ్యంలో సంస్థ సీఈఓ సంతోషం వ్యక్తంచేశారు. తొలి 60 రోజుల పనితీరు సంతృప్తికరంగా ఉందని పేర్కొన్నారు. ఈ సంస్థ బోయింగ్‌ నుంచి 72 మ్యాక్స్‌ 737 విమానాల కొనుగోలుకు ఆర్డర్‌ పెట్టింది. వచ్చే ఏడాది రెండో అర్ధ భాగంలో అంతర్జాతీయ విమాన సర్వీసులను కూడా  ప్రారంభించాలని యోచిస్తోంది.