Torrent Pharma: టొరెంట్‌ ఫార్మా చేతికి క్యురేషియో హెల్త్‌కేర్‌

దిల్లీ: ప్రముఖ ఔషధ తయారీ సంస్థ టొరెంట్‌ ఫార్మాస్యూటికల్స్‌ చెన్నై కేంద్రంగా పనిచేస్తున్న క్యురేషియో హెల్త్‌కేర్‌ను కొనుగోలు చేయనుంది. ఈ ఒప్పంద విలువ రూ.2,000 కోట్లు. దీంతో టొరెంటోకు డెర్మటాలజీ విభాగంలో పట్టు నిలపుకొనేందుకు అవకాశం కలిగింది. కాస్మెటిక్‌, పీడియాట్రిక్‌ డెర్మటాలజీలో క్యురేషియో ఉత్పత్తులకు మంచి ఆదరణ ఉంది. ఈ కంపెనీ పోర్ట్‌ఫోలియోలో టెడిబార్‌, అటోగ్లా, స్పూ, బీ4 నప్పీ, పర్మైట్‌ వంటి దాదాపు 50 బ్రాండ్లు ఉన్నాయి. ఈ సంస్థ కు టాప్‌-10 బ్రాండ్ల నుంచే 75 శాతం ఆదాయం వస్తోంది.

2021-22లో క్యురేషియో రూ.224 కోట్ల ఆదాయాన్ని నివేదించింది. దీంట్లో దాదాపు 82 శాతం డెర్మటాలజీ ఉత్పత్తుల నుంచే వచ్చింది. ఈ కొనుగోలుతో టొరెంట్ ఫార్మా టాప్‌-10 డెర్మటాలజీ ఉత్పత్తుల తయారీ సంస్థల జాబితాలో చేరనుంది. కొత్తగా 600 మంది మెడికల్‌ రిప్రజెంటేటివ్‌లు, 900 మంది స్టాకిస్ట్‌లు కంపెనీలో చేరనున్నారు.