Updated : 07 Jul 2022 12:14 IST

Credit Card: క్రెడిట్‌కార్డుపై రివార్డు పాయింట్లను ఇలా ట్రాక్‌ చేయండి

ఇంటర్నెట్‌ డెస్క్‌: క్రెడిట్‌ కార్డు (Credit card) ద్వారా చేసే చెల్లింపులకు రివార్డు పాయింట్ల (Reward Points) రూపంలో ప్రయోజనాలు లభిస్తుంటాయి. వీటిని నగదు రూపంలోకి మార్చుకోవచ్చు. లేదా కొనుగోళ్ల సమయంలో రాయితీ పొందొచ్చు. వివిధ మార్గాల ద్వారా మీ క్రెడిట్‌ కార్డు (Credit card)పై ఉన్న ప్రయోజనాలను కంపెనీలు మీకు తెలియజేస్తుంటాయి. అయితే, అన్నింటినీ గుర్తుంచుకోవడం అంత సులభం కాదు. పైగా మన పనుల్లో తీరికలేక వీటిని మర్చిపోతే ప్రయోజనాల కాలపరిమితి ముగిసిపోతుంటుంది. మరి వీటిపై ఎప్పటికప్పుడు ఓ కన్నేసి ఉంచడానికి ఉన్న మార్గాలను చూద్దాం.

క్రెడిట్‌ కార్డు స్టేట్‌మెంట్‌ను తరచూ చెక్‌ చేసుకోండి..

నెలవారీ స్టేట్‌మెంట్‌ చెక్‌ చేసుకోవడం వల్ల క్రెడిట్‌ కార్డు (Credit card)పై ఉన్న పాయింట్లు ఇతర ప్రయోజనాల గురించి తెలుసుకోవచ్చు. మీరు చేసిన ఖర్చు, లభించిన రివార్డులు (Reward Points) , వాటి కాలపరిమితి వంటి వివరాలు వాటిలో ఉంటాయి. ఫలితంగా మీకు వాటిపై ఓ అవగాహన ఉంటుంది. గడవులోగా ఉపయోగించడానికి అవకాశం ఏర్పడుతుంది.

రివార్డుల కాలపరిమితి ముందే తెలుసుకోవాలి...

రివార్డు పాయింట్ల (Reward Points) లభించిన వెంటనే అవి మీ క్రెడిట్‌ ఖాతాలో జమ అవుతాయి. కార్డుని బట్టి వాటి కాలపరిమితి ఆధారపడి ఉంటుంది. ఫిన్‌బూస్టర్‌ వంటి కార్డుల్లో పాయింట్లకు కాలపరిమితి ఉండదు. కొన్నింట్లో రివార్డు పాయింట్ల (Reward Points)ను ఉపయోగించుకోవడానికి 18-36 ఏళ్ల గడువు ఉంటుంది. దీన్ని తెలుసుకుంటే మీకు పాయింట్లు క్రెడిట్‌ అయిన దగ్గరి నుంచి ఆ గడువులోగా ఉపయోగించుకోవాలన్న అంశాన్ని దృష్టిలో ఉంచుకోవచ్చు.

రివార్డు పాయింట్లను ఎప్పటికప్పుడు ఉపయోగించుకోండి..

అన్ని రివార్డు పాయింట్లకు ఒకే కాలపరిమితి ఉండదు. చాలా పాయింట్లు పోగుపడి ఉంటే.. తొలుత గడువు తీరే పాయింట్లను ఉపయోగించడం ప్రారంభించాలి. ఇలా క్రమంగా రివార్డు పాయింట్లను వాటి కాలపరిమితులను అనుసరించి వాడుకోవాలి. ఫలితంగా మిగిలి ఉన్న పాయింట్లను ఎప్పుడు ఉపయోగించుకోవాలనే అంశంపై మీకు ఓ అవగాహన వస్తుంది. తద్వారా రివార్డు పాయింట్లు ప్రభావవంతంగా ఉపయోగించుకున్నవారవుతారు.

ట్రాకింగ్‌ యాప్స్‌ వాడండి..

ఒకటి కంటే ఎక్కువ క్రెడిట్‌ కార్డులు ఉన్నప్పుడు వాటిని సమర్థంగా నిర్వహించుకునేందుకు కొన్ని మొబైల్‌ యాప్‌లు అందుబాటులో ఉన్నాయి. ఇవి మీ క్రెడిట్‌ బిల్లింగ్‌ తేదీలు, రివార్డు పాయింట్ల వివరాలు, వాటి కాలపరిమితి వంటి అంశాలను ఎప్పటికప్పుడు మీకు గుర్తుచేస్తుంటాయి.

వార్షిక మైల్‌స్టోన్‌లు..

కొన్ని కార్డుల్లో ఏడాదిలో నిర్దేశించిన మొత్తం ఖర్చు చేస్తే ప్రత్యేకంగా రివార్డు పాయింట్లు లభిస్తుంటాయి. అందుకే రెండు, మూడు కార్డులు ఉన్నవారు ఒక కార్డుపై పరిమితిని ఉపయోగించుకొని రివార్డు పాయింట్లు పొందడానికి ప్రయత్నించాలి. తర్వాతే మరోకార్డును వాడుకోవాలి. ఫలితంగా లభించే ప్రత్యేక పాయింట్ల వల్ల కొనుగోళ్లపై కొంత మొత్తాన్ని ఆదా చేసుకోవచ్చు. అయితే,  ఒకే కార్డును ఉపయోగించేటప్పుడు మీ కార్డు యుటిలైజేషన్‌ రేషియో 50 శాతం మించకుండా చూసుకోవాలి. లేదంటే క్రెడిట్‌ స్కోర్‌పై ప్రభావం పడుతుంది.

క్రెడిట్‌ కార్డులు తరచూ ఉపయోగించుకునేవారికి రివార్డు పాయింట్ల రూపంలో కొంత మొత్తాన్ని ఆదా చేసుకునేందుకు అవకాశం ఉంటుంది. లేదంటే పాయింట్ల ప్రయోజనాలను పొందలేరు. మరి మీరు కార్డుని సమర్థంగా ఉపయోగించుకోనట్లవుతుంది. అందుకే పాయింట్లను ప్రభావవంతంగా వాడుకోవాలంటే వాటిని కాలపరిమితికి అనుగుణంగా ఎప్పటికప్పుడు వినియోగించుకోవాలి.

Read latest Business News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని