Twitter: ట్విటర్‌ ఖాతాలకు ‘అధికారిక’ ట్యాగ్‌.. గంటల్లోనే వెనక్కి తీసుకున్న మస్క్‌

ఇంటర్నెట్‌ డెస్క్‌: ట్విటర్‌ను కొనుగోలు చేసిన అపర కుబేరుడు ఎలాన్‌ మస్క్‌.. ఇప్పటికే ఈ మాధ్యమంలో అనేక మార్పులకు శ్రీకారం చుట్టారు. ట్విటర్‌ ఖాతాల బ్లూ టిక్‌ కోసం నెలకు 8 డాలర్లు వసూలు చేస్తామని వెల్లడించారు. అయితే దీని వల్ల నకిలీ ఖాతాలు కూడా బ్లూ టిక్‌ను పొందే ప్రమాదముందని ఆందోళనలు వ్యక్తమయ్యాయి. దీంతో ట్విటర్‌ ‘అధికారిక (Official)’ ట్యాగ్‌ అనే ఫీచర్‌ను తీసుకొచ్చింది. ప్రభుత్వ అధికారిక ఖాతాలు, ప్రముఖ వ్యాపార ప్రొఫైళ్లకు ఈ ట్యాగ్‌ను జత చేయనున్నట్లు సంస్థ ప్రకటించింది.

అన్నట్లుగానే బుధవారం సాయంత్రం నుంచి కొన్ని ఖాతాలకు ఈ ‘అధికారిక’ ట్యాగ్‌ను జత చేశారు. భారత్‌లో ప్రధానమంత్రి నరేంద్రమోదీ సహా పలువురు కేంద్ర మంత్రులు, రాజకీయ, క్రీడా ప్రముఖులు, పలు మీడియా సంస్థల ఖాతాలకు ఈ ట్యాగ్‌ కన్పించింది. అయితే, వీరితో పాటు కొందరు ప్రభుత్వేతర వ్యక్తుల ఖాతాలకు కూడా ఈ బ్యాడ్జ్‌ జత చేయడం గందరగోళానికి దారితీసింది. దీంతో గంటల వ్యవధిలోనే ఈ ఫీచర్‌ను ట్విటర్‌ తొలగించింది.

ఈ మార్పును గుర్తిస్తూ అమెరికన్‌ యూట్యూబర్‌ మార్కస్‌ బ్రౌన్‌లీ ట్వీట్ చేశారు. తొలుత తన ఖాతాకు ‘అధికారిక’ ట్యాగ్‌ వచ్చిందని పేర్కొన్న బ్రౌన్‌లీ.. ఆ తర్వాత అది కన్పించకుండా పోయిందని తెలిపారు. దీనికి ఎలాన్‌ మస్క్‌ కూడా స్పందించారు. ‘‘ఇప్పుడే దాన్ని తొలగించాం’’ అని రాసుకొచ్చారు.