Uber: ఉబర్‌లో ప్రయాణిస్తుంటారా? కొత్తగా వచ్చిన ఫీచర్లివే..

ప్రముఖ క్యాబ్‌ సేవల సంస్థ ఉబర్‌ భారత్‌లో కొన్ని కొత్త ఫీచర్లను తీసుకొచ్చింది. ప్రయాణికుల భద్రతకు పెద్దపీట వేస్తూ వీటిని తీసుకొచ్చినట్లు ఆ కంపెనీ తెలిపింది.

Published : 30 Nov 2022 18:00 IST

ఇంటర్నెట్‌ డెస్క్‌: ప్రముఖ క్యాబ్‌ సేవల సంస్థ ఉబర్‌ (UBER) తన సేవలను మెరుగు పరుచుకోవడంలో భాగంగా భారత్‌లో కొన్ని కొత్త ఫీచర్లను తీసుకొచ్చింది. ప్రయాణికుల భద్రతకు పెద్దపీట వేస్తూ వీటిని తీసుకొచ్చినట్లు ఆ కంపెనీ తెలిపింది. వెనుకవైపు కూర్చునేవారు సీటు బెల్టు ధరించాలని చెప్పడం, అత్యవసర కస్టమర్‌కేర్‌ సదుపాయం వంటివి ఇందులో ఉన్నాయి. తరచూ క్యాబుల్లో ప్రయాణించేవారు ఈ విషయాలు తెలుసుకోవడం మంచిది.

ఉబర్‌లో ఇకపై ఎవరైనా క్యాబ్‌ బుక్‌ చేసుకుంటే కారు ఎక్కగానే.. డ్రైవర్‌ ఫోన్‌ నుంచి ‘సీటు బెల్టు పెట్టుకోండి’ అనే సందేశం వినిపిస్తుంది. అదే సమయంలో ప్రయాణికుడి ఫోన్‌కు సైతం ఓ పుష్‌ నోటిఫికేషన్‌ వస్తుంది. అలాగే, లైవ్‌ లొకేషన్‌ సహా కీలక సమాచారాన్ని స్థానిక పోలీసులతో పంచుకునేందుకు SOS ఇంటిగ్రేషన్‌ను ఉబర్‌ ప్రారంభించింది. ఇప్పటికే హైదరాబాద్‌లో ఈ సదుపాయం అందుబాటులో ఉంది. మరిన్ని ప్రధాన నగరాల్లో ఈ సర్వీసును త్వరలో ప్రారంభించేందుకు స్థానిక పోలీసులతో చర్చలు జరుపుతోంది.

అలాగే, అత్యవసరంగా ప్రయాణికుడికి ఏదైనా అవసరం అయినప్పుడు కస్టమర్‌కేర్‌తో మాట్లాడేందుకు 24×7 సేఫ్టీలైన్‌ వ్యవస్థను ఉబర్‌ ప్రారంభించింది. భద్రతాపరంగా ఎలాంటి ఇబ్బందులు ఎదురైనా ఉబర్‌ యాప్‌ ద్వారా 88006 88666 నంబర్‌కు డయల్‌ చేయొచ్చని కంపెనీ తెలిపింది. 30 సెకన్లలోపే కంపెనీ ప్రతినిధి అందుబాటులోకి వస్తారని పేర్కొంది. వీటితో పాటు 2019లో రైడ్‌చెక్‌ పేరిట తీసుకొచ్చిన ఫీచర్‌కు మరిన్ని మెరుగులు అద్దింది. నిర్దేశిత సమయానికంటే ఎక్కువ సమయం వాహనం ఆపితే అటు డ్రైవర్‌కు, ఇటు ప్రయాణికుడికి అంతా సవ్యంగానే ఉందా? అనే ప్రశ్నతో కూడిన నోటిఫికేషన్‌ వెళుతుంది. గమ్యస్థానం చేరేలోగా నిర్దేశిత రూట్‌లో కాకుండా వేరే రూట్‌లో వెళ్లినా, గమ్యస్థానం కంటే ముందే నిలిపేసినా ‘రైడ్‌చెక్‌’ ప్రయాణికులను అలర్ట్‌ చేస్తుంది. కొత్తగా నగరానికి వచ్చిన వారికి, రాత్రివేళ ప్రయాణించే వారికి ఈ ఫీచర్‌ ఉపయోగపడుతుంది.

Read latest Business News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

సుఖీభవ

చదువు