డిపాజిట్ల వ‌డ్డీ రేట్ల‌ను పెంచిన ఉజ్జీవ‌న్ బ్యాంకు

ప్ర‌ముఖ స్మాల్ ఫైనాన్స్ బ్యాంకు.. ఉజ్జీవ‌న్ స్మాల్ ఫైనాన్స్ బ్యాంకు సాధార‌ణ ఎఫ్‌డీల‌పై 7.1% వ‌ర‌కు వ‌డ్డీ రేటును పెంచింది. ఫిక్స్‌డ్ డిపాజిట్ల‌పై వ‌డ్డీ రేటు 75 బేసిస్ పాయింట్లు పెంచి 15 నెల‌ల ఒక రోజు నుండి 18 నెల‌ల కాల‌వ్య‌వ‌ధికి 6.75%; 990 రోజుల‌కు, 35 బేసిస్ పాయింట్లు పెంచి 7.1% వ‌డ్డీ రేటును అందిస్తుంది.

ప్లాటినా ఫిక్స్‌డ్ డిపాజిట్‌పై వ‌డ్డీ రేట్ల‌ను, 990 రోజుల‌కు సంవ‌త్స‌రానికి 7.45% వ‌డ్డీ రేటుగా నిర్ణ‌యించింది. ప్లాటినా ఫిక్స్‌డ్ డిపాజిట్ల‌పై పెట్టుబ‌డి పెట్టే సీనియ‌ర్ సిటిజ‌న్లు ఇప్పుడు 7.95% వ‌ర‌కు వ‌డ్డీ పొంద‌వ‌చ్చు. సీనియ‌ర్ సిటిజ‌న్లు అన్ని కాల వ్య‌వ‌ధుల ఫిక్స్‌డ్ డిపాజిట్ల‌పై అద‌నంగా 50 బేసిస్ పాయింట్ల‌ను పొందుతారు. వినియోగ‌దారులు ఈ ప్లాన్ కింద క‌నీసం రూ. 15 ల‌క్ష‌ల నుండి రూ. 2 కోట్ల కంటే త‌క్కువ పెట్టుబ‌డి పెట్ట‌వ‌చ్చు. ప్లాటినా ప‌థ‌కంలో పాక్షిక, అకాల ఉప‌సంహ‌ర‌ణ సౌక‌ర్యం అందుబాటులో లేదు. ఒక సీనియ‌ర్ సిటిజ‌న్ ప్లాటినా ఫిక్స్‌డ్ డిపాజిట్‌లో 990 రోజుల పాటు రూ. 20,00,000 పెట్టుబ‌డి పెడితే మెచ్యూరిటీ స‌మ‌యంలో రూ. 24,75,572/- వ‌ర‌కు పొంద‌వ‌చ్చు.

సరికొత్త వ‌డ్డీ రేట్లు మే 19, 2022 నుండి అమలు లోకి వస్తాయి. రూ. 2 కోట్ల కంటే త‌క్కువ ఫిక్స్‌డ్ డిపాజిట్ల‌ వ‌డ్డీ రేట్లు `ఎన్ఆర్ఈ`, `ఎన్ఆర్ఓ` ల‌కు కూడా వ‌ర్తిస్తుంది. ఈ వ‌డ్డీ రేట్ల పెంపు వినియోగ‌దారులకు వ‌డ్డీపై ఆస‌క్తిని పెంచాల‌నే ఉద్దేశ్యంతోనే పెంచిన‌ట్లు ఈ బ్యాంకు ప్ర‌తినిధి తెలిపారు. ఉజ్జీవ‌న్ స్మాల్ ఫైనాన్స్ బ్యాంకు, ఈ వ‌డ్డీ రేట్ల పెంపుతో బ్యాంకింగ్ సెక్టార్‌లో ఇత‌ర బ్యాంకుల క‌న్నా వ‌డ్డీ రేట్ల‌ను ఆక‌ర్ష‌ణీయంగా మార్చింది.

పాత వ‌డ్డీ రేట్లు, స‌వ‌రించిన కొత్త వ‌డ్డీ రేట్లు ఈ క్రింది ప‌ట్టిక‌లో ఉన్నాయి.

సీనియ‌ర్ సిటిజ‌న్లు అన్ని కాల వ్య‌వ‌ధుల ఫిక్స్‌డ్ డిపాజిట్ల‌పై అద‌నంగా 50 బేసిస్ పాయింట్ల‌ను పొందుతారు.

ప‌ట్టిక సూచించిన‌ట్లుగా 7.1% వ‌డ్డీ రేటుతో 990 రోజుల‌కు రూ. 1,00,000 పెట్టుబ‌డి పెట్టిన వ్య‌క్తి మెచ్యూరిటీ స‌మ‌యంలో రూ. 1,21,011/- వ‌ర‌కు పొంద‌వ‌చ్చు. ఉజ్జీవ‌న్ స్మాల్ ఫైనాన్స్ బ్యాంకు నెల‌వారీ, త్రైమాసిక‌, మెచ్యూరిటీ వ‌డ్డీ చెల్లింపు ఎంపిక‌ల‌ను కూడా అనుమ‌తిస్తుంది.

పైన పేర్కొన్న వ‌డ్డీ రేట్లు 'ట్యాక్స్ సేవ‌ర్ ఫిక్స్‌డ్ డిపాజిట్ల‌'పై కూడా వ‌ర్తిస్తాయి. అయితే, వారు 5 ఏళ్ల లాక్‌-ఇన్ వ్య‌వ‌ధిని క‌లిగి ఉంటారు. అంతేకాకుండా బ్యాంకింగ్ సెక్టార్‌లో డిపాజిట్ల‌కు రూ. 5 ల‌క్ష‌ల వ‌ర‌కే బీమా ఉంటుంది. చిన్న బ్యాంకుల్లో డిపాజిట్ వేసేవారు ఈ ముఖ్య‌మైన విష‌యాన్ని గ‌మ‌నించాలి.