Unacademy: మరో 10% ఉద్యోగుల్ని తొలగించిన అన్‌అకాడెమీ

దిల్లీ: ప్రముఖ ఎడ్యుటెక్ సంస్థ అన్‌అకాడెమీ మరో 350 మంది ఉద్యోగుల్ని తొలగించనుంది. కంపెనీ మొత్తం ఉద్యోగుల సంఖ్యలో ఇది 10 శాతానికి సమానం. వ్యయ నియంత్రణలో భాగంగానే ఈ నిర్ణయం తీసుకున్నట్లు కంపెనీ సీఈఓ గౌరవ్‌ ముంజల్‌ తెలిపారు. ఇది కష్టమైన నిర్ణయమే అయినప్పటికీ.. తప్పడం లేదని ఉద్యోగులకు పంపిన మెయిల్‌లో పేర్కొన్నారు.

తొలగించిన ఉద్యోగులకు నోటీసు పీరియడ్‌తో పాటు అదనంగా రెండు నెలలకు సమానమైన వేతనాన్ని ఇవ్వనున్నట్లు ముంజల్‌ తెలిపారు. అలాగే అదనంగా ఒక ఏడాదికి ఆరోగ్య బీమా కవరేజీని కొనసాగిస్తామన్నారు. మరో ఉద్యోగం పొందడానికి కావాల్సిన మద్దతు కూడా ఇస్తామన్నారు. పెట్టుబడులు పూర్తిగా నెమ్మదించాయని.. ఆన్‌లైన్‌ కార్యకలాపాలు సైతం తగ్గుముఖం పట్టినట్లు తెలిపారు. గత ఏప్రిల్‌లోనే అన్‌అకాడెమీ 1,000 మంది ఉద్యోగుల్ని తొలగించిన విషయం తెలిసిందే.