PSU Banks: రూ.35వేల కోట్లు.. క్లెయిమ్‌ చెయ్యని డిపాజిట్లు ఆర్బీఐకి!

దిల్లీ: జాతీయ బ్యాంకుల్లో ఉన్న క్లెయిమ్‌ చేయని డిపాజిట్లను (Unclaimed Deposits) రిజర్వ్‌ బ్యాంక్‌ ఆఫ్‌ ఇండియాకు (RBI) బదిలీ చేసినట్లు కేంద్ర ప్రభుత్వం వెల్లడించింది. పదేళ్లు, అంతకుమించి నిర్వహణలో లేని డిపాజిట్ల మొత్తం ఫిబ్రవరి 2023 నాటికి రూ.35,012 కోట్లుగా ఉన్నట్లు తెలిపింది. ఇలా నిర్వహణ లేని 10.24కోట్ల ఖాతాలకు చెందిన డిపాజిట్లను ఆర్బీఐకి ట్రాన్స్‌ఫర్‌ చేసినట్లు కేంద్ర ఆర్థిక మంత్రిత్వశాఖ పార్లమెంటుకు తెలియజేసింది.

ఆర్బీఐ దగ్గర ఉన్న సమాచారం ప్రకారం, ఫిబ్రవరి 2023 నాటికి నిర్వహణలో లేని ఖాతాలకు చెందిన రూ. 35,012 కోట్లను ఆర్బీఐకి బదిలీ చేసినట్లు కేంద్ర ఆర్థికశాఖ సహాయ మంత్రి భాగవత్‌ కరాడ్‌ లోక్‌సభలో లిఖిత పూర్వక సమాధానం ఇచ్చారు. వీటిలో అత్యధికంగా రూ.8086కోట్లు భారతీయ స్టేట్‌ బ్యాంకు (SBI)లోనే ఉండగా.. పంజాబ్‌ నేషనల్‌ బ్యాంకులో రూ.5340 కోట్లు, కెనరా బ్యాంకులో రూ.4558 కోట్లు, బ్యాంక్‌ ఆఫ్‌ బరోడాలో రూ.3904 కోట్లు ఉన్నాయని చెప్పారు.

మరణించిన ఖాతాదారుల క్లెయిమ్‌ల సెటిల్మెంట్‌కు సంబంధించి, వారి కుటుంబ సభ్యులకు ఎస్బీఐ సిబ్బంది సహాయం అందిస్తారని కేంద్ర మంత్రి వెల్లడించారు. ఇందుకు సంబంధించి అన్ని విభాగాల సిబ్బందికి సూచనలు ఇచ్చామని అన్నారు. క్లెయిమ్‌ చేయని ఖాతాదారుల ఆచూకీని కనుగొనేందుకు ప్రత్యేక డ్రైవ్‌లను కూడా చేపట్టాలని బ్యాంకులను తెలియజేశామన్నారు.