LPG eKYC: వంటగ్యాస్‌ ఈకేవైసీకి తుది గడువుపై.. కేంద్ర మంత్రి క్లారిటీ

LPG eKYC compliance: వంటగ్యాస్‌ ఈకేవైసీపై కేంద్రం క్లారిటీ ఇచ్చింది. దీనికి ఎలాంటి డెడ్‌లైన్‌ విధించలేదని స్పష్టం చేసింది.

Published : 09 Jul 2024 12:45 IST

దిల్లీ: గ్యాస్‌ వినియోగదారులు ఈకేవైసీ నమోదు (LPG eKYC compliance) ప్రక్రియ చేపట్టాలంటూ కొన్ని నెలల కిందట కేంద్రప్రభుత్వం చమురు మార్కెటింగ్‌ కంపెనీలను ఆదేశించింది. దీంతో ఎల్‌పీజీ కంపెనీలు ఈ ప్రక్రియను ప్రారంభించాయి. అయితే, గ్యాస్‌ ఏజెన్సీల వద్ద మాత్రమే ఈకేవైసీని నమోదు చేయాలని కొన్ని కంపెనీలు పట్టుబడుతుండటంతో ప్రజలు ఇబ్బందులు పడుతున్నారు. దీనిపై తాజాగా కేరళ శాసనసభ ప్రతిపక్ష నేత వీడీ సతీశన్‌.. కేంద్రమంత్రి హర్‌దీప్‌సింగ్‌ పూరీ (Hardeep Singh Puri)కి లేఖ రాశారు. దీనిపై స్పందించిన కేంద్రమంత్రి.. ఈకేవైసీ ప్రక్రియపై క్లారిటీ ఇచ్చారు. అంతేగాక.. దీని నమోదుకు ఎలాంటి తుది గడువు విధించలేదని స్పష్టం చేశారు.

‘‘బోగస్‌ కస్టమర్లను తొలగించేందుకే చమురు మార్కెటింగ్‌ సంస్థలు (Oil Marketing Companies) ఈకేవైసీ ఆధార్‌ అథెంటికేషన్‌ పక్రియను చేపడుతున్నాయి. గత 8 నెలలుగా ఇది కొనసాగుతోంది. ఎల్‌పీజీ డెలివరీ సిబ్బంది గ్యాస్‌ సిలిండర్లను డెలివరీ చేసే సమయంలోనే కస్టమర్స్‌ వివరాలను వెరిఫై చేస్తారు. వారి మొబైల్‌ ఫోన్లలోని యాప్‌తో వినియోగదారుల ఆధార్‌ వివరాలను నమోదు చేసుకొని ఈ ప్రక్రియను పూర్తి చేస్తారు. లేదా కస్టమర్లు తమ సౌలభ్యం మేరకు దగ్గర్లోని డిస్ట్రిబ్యూటర్‌ షోరూమ్‌కు వెళ్లి కూడా దీన్ని పూర్తి చేయొచ్చు. దీంతో పాటు చమురు మార్కెటింగ్‌ సంస్థల యాప్‌లను ఇన్‌స్టాల్‌ చేసుకొని సొంతంగా కేవైసీ అప్‌డేట్‌ (KYC Update) చేసుకోవచ్చు’’ అని కేంద్రమంత్రి వివరించారు.

ఈ ప్రక్రియను పూర్తి చేసేందుకు చమురు సంస్థలు గానీ.. కేంద్ర ప్రభుత్వం గానీ ఎలాంటి తుది గడువు విధించలేదని హర్‌దీప్‌ సింగ్‌ పూరీ స్పష్టం చేశారు. ఎల్‌పీజీ ఏజెన్సీల్లోనే కచ్చితంగా ఈకేవైసీ నమోదు చేయాలనే నిబంధనేదీ లేదని వెల్లడించారు. వినియోగదారులకు కంపెనీలు ఎలాంటి అసౌకర్యం కలిగించబోవని తెలిపారు.

Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని

ap-districts
ts-districts

సుఖీభవ

చదువు