ఫీచ‌ర్ ఫోన్ వాడుతున్నారా? తెలుగు వాయిస్‌తో ఇక UPI చెల్లింపులు!

ఇంటర్నెట్‌ డెస్క్‌: యూపీఐ చెల్లింపు వ్య‌వ‌స్థ గ‌తంలో స్మార్ట్ ఫోన్ వినియోగ‌దారుల‌కు మాత్ర‌మే అందుబాటులో ఉండేది. కానీ 'యూపీఐ 123పే' సేవ‌ల‌ను ప్రారంభించిన త‌ర్వాత ఫీచ‌ర్ ఫోన్ వినియోగ‌దారుల‌కూ ఆ సేవలు అందుబాటులోకి వ‌చ్చాయి. ఇప్పుడు ఫీచ‌ర్ ఫోన్ వినియోగ‌దారులు త‌మ‌కు న‌చ్చిన భాష‌లో మాట్లాడి యూపీఐ చెల్లింపులు చేయొచ్చు. ఇందుకోసం టోన్‌ ట్యాగ్ సంస్థ కొత్త సదుపాయాన్ని తీసుకొచ్చింది. ఈ సంస్థ దేశంలోని పెద్ద ప్రభుత్వ రంగ బ్యాంకుల భాగ‌స్వామ్యంతో 'యూపీఐ 123 పే' సేవ‌ల‌ను ఈ ఏడాది ప్రారంభంలో లాంచ్ చేసింది. ప్ర‌స్తుతం టోన్ ట్యాగ్‌ ఫ‌స్ట్ వాయిస్‌ సొల్యూష‌న్‌తో ఈ సేవ‌ల‌ను మ‌రింత‌ విస్త‌రించ‌నున్న‌ట్లు తెలిపింది.

ఇది పట్టణ, గ్రామీణ భార‌త‌దేశం మధ్య ఉన్న డిజిటల్ చెల్లింపుల అంత‌రాన్ని తగ్గిస్తుందని ఆ సంస్థ ఓ ప్రకటనలో తెలిపింది. హిందీ, తమిళం, తెలుగు, మలయాళం, కన్నడ, బెంగాలీ వంటి ప్రాంతీయ భాషల్లో యూపీఐ చెల్లింపులు చేసేందుకు అనుమ‌తిస్తుందని పేర్కొంది. ప్ర‌స్తుతం ఈ సేవ‌లు కొన్ని ప్రాంతీయ భాష‌ల‌లో మాత్ర‌మే అందుబాటులో ఉన్నాయని, త్వ‌ర‌లోనే గుజరాతీ, మరాఠీ, పంజాబీ వంటి మ‌రికొన్ని భాష‌ల‌లో కూడా అందుబాటులోకి తీసుకొస్తామ‌ని ఆ సంస్థ వెల్లడించింది.

ఎలా ప‌నిచేస్తుంది?

చెల్లింపుల కోసం వినియోగదారులు 6366 200 200 ఐవీఆర్ నంబ‌ర్‌కు కాల్ చేసి వారి ప్రాంతీయ భాష‌ను ఎంపిక చేసుకుని ఆర్థిక లావాదేవీలు కొన‌సాగించ‌వ‌చ్చు. ఈ సేవ‌తో వినియోగ‌దారులు నిధుల‌ను బ‌దిలీ చేయ‌లేరు. యుటిలిటీ బిల్లు చెల్లింపులు, బ్యాలెన్స్ ఎంక్వైరీ, ఫాస్ట్‌ట్యాగ్ యాక్టివేషన్ లేదా రీఛార్జ్ వంటివి వాయిస్ ఉప‌యోగించి చేయ‌వ‌చ్చు. ఎన్ఎస్‌డీఎల్ పేమెంట్స్ బ్యాంక్‌, ఎన్‌పీసీఐ భాగ‌స్వామ్యంతో ఈ సదుపాయాన్ని టోన్‌ ట్యాగ్‌ సంస్థ తీసుకొచ్చింది.