Breaking | Feedback | ePratibha | E-PAPER | Pratibha

Swiggy: యూజర్ల నుంచి స్విగ్గీ చిల్లర కొట్టేస్తోందా? కంపెనీ వివరణ ఇదే..!

Swiggy on Extra charge: ఒక్కో ఆర్డర్‌పై రూ.3 చొప్పున స్విగ్గీ అదనంగా వసూలు చేస్తోందంటూ సోషల్‌మీడియాలో రెండ్రోజులుగా పోస్టులు వెల్లువెత్తున్నాయి. దీనిపై స్విగ్గీ స్పందించింది.

Updated : 22 Sep 2023 19:18 IST

Swiggy extra charge | ఇంటర్నెట్‌ డెస్క్‌: ప్రముఖ ఫుడ్‌ డెలివరీ యాప్‌ స్విగ్గీ (Swiggy) వార్తలకెక్కింది. ఆర్డర్‌ సమయంలో చిల్లర కొట్టేస్తోందంటూ పలువురు యూజర్లు సోషల్‌మీడియా వేదికగా ఫిర్యాదులు చేస్తున్నారు. బిల్లు మొత్తం రౌండాఫ్‌ పేరిట దాదాపు రూ.3 వరకు అదనంగా వసూలు చేస్తోందంటూ ఆరోపిస్తున్నారు. సోషల్‌మీడియాలో జరుగుతున్న ఈ ప్రచారంపై స్విగ్గీ స్పందించింది. సాంకేతిక లోపం కారణంగానే అలా చూపుతోందంటూ వివరణ ఇచ్చింది.

@kingslyj అనే యూజర్‌ ఎక్స్‌లో (ట్విటర్‌) స్విగ్గీ మోసం అని పేర్కొంటూ ఓ పోస్ట్‌ పెట్టాడు. ఒకప్పుడు స్విగ్గీ రౌండాఫ్‌ పేరిట పైసల్లో తీసుకునేదని, ఇప్పుడు ఒక్కో బిల్లుపై రూ.3 చొప్పున అదనంగా వసూలు చేస్తోందని తన పోస్ట్‌లో పేర్కొన్నాడు. తాను ఆర్డర్‌ చేసిన ఫుడ్‌కు వాస్తవంగా రూ.671.91 కాగా (626.57+35.24+2.00+28.00-52.99+33.09 = 671.91) తన వద్ద రౌండాఫ్‌ పేరిట 9 పైసలతో పాటు అదనంగా మరో రూ.3 స్విగ్గీ తీసుకుందని తెలిపాడు. కస్టమర్లకు ఎలాంటి సర్వీసూ ఇవ్వకుండానే ఏటా కోట్లాది రూపాయలు ఇలా స్విగ్గీ దోచుకుంటోందని ఆరోపించాడు.

ఫ్లెక్సీ క్యాప్‌.. మల్టీ క్యాప్‌.. పెట్టుబడి ఏ విభాగంలో?

ఇదే ట్వీట్‌పై క్యాపిటల్‌ మైండ్‌ సీఈఓ, వ్యవస్థాపకుడు దీపక్‌ సెనోయ్‌ సైతం స్పందించారు. స్విగ్గీ వేదికగా తనకెదురైన అనుభవాన్ని పంచుకున్నారు. తాను రూ.255.60 విలువైన ఫుడ్‌ ఆర్డర్‌ చేయగా.. తనకు రూ.259 స్విగ్గీ ఛార్జీ చేసినట్లు పేర్కొన్నారు. అలాగే ప్లాట్‌ఫామ్‌ ఫీజు రూ.5గా పేర్కొని డిస్కౌంట్ పేరిట మళ్లీ రూ.2గా చూపించి.. వాస్తవంలో మళ్లీ ఆ మూడు రూపాయలు అదనంగా వసూలు చేస్తున్నారంటూ తన స్వీయ అనుభవాన్ని వివరించారు. బహుశా ఇది డిస్‌ప్లే ఎర్రర్‌ కావొచ్చనీ అభిప్రాయపడ్డారు. ఈ పోస్టులపై కొందరు తమకెదురైన అనుభవాన్ని పంచుకున్నారు. సోషల్‌ మీడియాలో జరుగుతున్న ఈ ప్రచారంపై స్విగ్గీ స్పందించింది. ‘‘ఆర్డర్‌ హిస్టరీ పేజీలో కొందరికి డిస్కౌంట్‌ అమౌంట్‌ తక్కువగా చూపిస్తోంది. వాస్తవానికి కస్టమర్లు వాస్తవ మొత్తాన్నే చెల్లించారు. టెక్నికల్‌ బగ్‌ కారణంగా ఆర్డర్‌ హిస్టరీ పేజీలో మాత్రమే ఇలా చూపిస్తోంది. మా టెక్నికల్‌ టీమ్‌ ఈ బగ్‌ను సరిచేసింది. ఇకపై మీకు నచ్చిన ఫుడ్‌ను ఆర్డర్‌ చేసుకోవచ్చు’’ అని స్విగ్గీ తెలిపింది.

► Read latest Business News and Telugu News

► Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.