Ads: ప్రకటనలపై అభ్యంతరాలా? దర్యాప్తు సంస్థలకు ఫిర్యాదు చేయొచ్చు!

లోక్‌సభలో కేంద్రం స్పష్టీకరణ

దిల్లీ: సామాజిక మాధ్యమాల్లో వచ్చే అనవసర, పక్కదారి పట్టించే ప్రకటనలపై వినియోగదారులు దర్యాప్తు సంస్థలకు ఫిర్యాదు చేయొచ్చని కేంద్ర ఎలక్ట్రానిక్స్‌, ఐటీ శాఖ సహాయ మంత్రి రాజీవ్‌ చంద్రశేఖర్‌ సూచించారు. ఈ మేరకు ఓ సభ్యుడు అడిగిన ప్రశ్నకు బుధవారం ఆయన లోక్‌సభలో లిఖితపూర్వక సమాధానం ఇచ్చారు. ఐటీ నిబంధనల ప్రకారం.. ప్రకటనలపై వచ్చే ఫిర్యాదులను సోషల్‌ మీడియా వంటి మధ్యవర్తిత్వ సంస్థలు పరిష్కరించాల్సి ఉంటుందని స్పష్టం చేశారు. కోర్టు ఆదేశాలు, ప్రభుత్వ నోటీసులు, అధీకృత ఏజెన్సీల ద్వారా వచ్చే ఆదేశాల మేరకు అనుచిత కంటెంట్‌ను వెంటనే సామాజిక మాధ్య సంస్థలు తొలగించాల్సి ఉంటుందని  తెలిపారు. డిజిటల్‌ మీడియా సహా ఇతర ఏ వేదికలపైనైనా అనవసర ప్రకటనలపై ఫిర్యాదు చేసేందుకు ‘వినియోగదారుల వ్యవహారాల విభాగం’ ప్రత్యేక ఆన్‌లైన్‌ పోర్టల్‌ను నిర్వహిస్తున్నట్లు పేర్కొన్నారు. అక్కడి నుంచి కూడా ఫిర్యాదు చేసే అవకాశం ఉందని వెల్లడించారు.