Vehicle Retail Sales: వాహన రిటైల్‌ విక్రయాల్లో 10% వృద్ధి

దిల్లీ: వాహన రిటైల్‌ విక్రయాలు (Vehicle retail sales) మే నెలలో వార్షిక ప్రాతిపదికన 10 శాతం వృద్ధి చెందాయి. దాదాపు అన్ని విభాగాల్లో వృద్ధి నమోదైనట్లు వాహన డీలర్ల సమాఖ్య ఫాడా తెలిపింది. ద్విచక్ర వాహన అమ్మకాల్లో (Two wheeler sales) 9%, త్రిచక్ర వాహనాలు 79%, ప్రయాణికుల వాహనాలు (Passenger vehicles- PV) 4%, ట్రాక్టర్లు 10%, వాణిజ్య వాహన విక్రయాల్లో 7% వృద్ధి నమోదైనట్లు తెలిపింది.

• కరోనా కంటే ముందుతో పోలిస్తే మాత్రం విక్రయాలు ఇంకా రెండు శాతం పుంజుకోవాల్సి ఉంది. అత్యధికంగా ద్విచక్ర వాహన విభాగపు అమ్మకాలు కరోనా ముందుకంటే ఇంకా 8 శాతం తక్కువగా ఉన్నాయి. వాణిజ్య వాహన విక్రయాలూ 7 శాతం పుంజుకోవాల్సి ఉంది.
• విద్యుత్తు వాహన విక్రయాలు (Electric Vehicle Sales) మే నెలలో మంచి వృద్ధిని నమోదు చేసినట్లు ఫాడా నివేదిక తెలిపింది. మొత్తం రిటైల్‌ విక్రయాల్లో ఈవీల వాటా 8 శాతమని వెల్లడించింది. మొత్తం ఈవీ విక్రయాల పెరుగుదలలో ద్విచక్ర వాహనాల వాటా 7 శాతం కాగా.. త్రిచక్ర వాహన అమ్మకాలు 56 శాతం పుంజుకున్నట్లు తెలిపింది.
• పెళ్లిళ్ల సీజన్‌ నేపథ్యంలో ద్విచక్ర వాహన విక్రయాల్లో మంచి వృద్ధి నమోదైనట్లు ఫాడా అభిప్రాయపడింది. జూన్‌ నుంచి ఫేమ్‌-2 సబ్సిడీ తగ్గనున్న నేపథ్యంలోనూ విక్రయాలు పుంజుకున్నాయని పేర్కొంది. గ్రామీణ ప్రాంతాల్లోనూ అమ్మకాలు పెరిగాయని తెలిపింది.
• క్రితం నెల పీవీ విక్రయాల్లో తగ్గుదల నమోదైన విషయం తెలిసిందే. అయితే, కార్లు అందుబాటులోకి రావడం, పెండింగ్‌ ఆర్డర్లను కంపెనీలు అందజేయడం, కొత్త మోడళ్ల రాకతో మే నెలలో తిరిగి కార్ల విక్రయాలు పుంజుకున్నాయి.