Volvo: భారత్‌లో వోల్వో తొలి విద్యుత్తు కారు.. ఒక్కసారి ఛార్జ్‌ చేస్తే 418 KM!

Volvo XC40 Recharge: వోల్వో కార్‌ (Volvo Car) ఇండియా భారత్‌లో తొలి విద్యుత్తు కారు (Electric car)ను మంగళవారం విడుదల చేసింది. ఎక్స్‌సీ40 రీఛార్జ్‌ (Volvo XC40 Recharge) ఎలక్ట్రిక్‌ పేరిట తీసుకొస్తున్న ఈ ఎస్‌యూవీ ధర రూ.55.90 లక్షలు (ఎక్స్‌షోరూం). భారత్‌లో అసెంబుల్‌ చేస్తున్న తొలి విలాసవంత విద్యుత్తు కారు ఇదే. రేపటి నుంచి కంపెనీ వెబ్‌సైట్‌లో బుకింగ్స్‌ ప్రారంభం కానున్నాయి. రూ.50 వేలు చెల్లించి కారును బుక్‌ చేసుకోవచ్చు. అక్టోబరు నుంచి వినియోగదారులను అందజేస్తామని కంపెనీ తెలిపింది.

కాంపాక్ట్‌ మాడ్యులార్‌ ఆర్కిటెక్చర్‌ (CMA) ప్లాట్‌ఫామ్‌పై వోల్వో ఎక్స్‌సీ40 రీఛార్జ్‌ (Volvo XC40 Recharge)ను నిర్మించారు. సాధారణ ఎక్స్‌సీ40ని కూడా ఇదే వేదికపై రూపొందించారు. ఇది రెండు విద్యుత్తు మోటార్లతో నడుస్తుంది. 660 ఎన్‌ఎం టార్క్‌ వద్ద 402 బీహెచ్‌పీ శక్తిని విడుదల చేస్తుంది. కేవలం 4.9 సెకన్లలో 0-100 కేఎంపీహెచ్‌ వేగాన్ని అందుకుంటుంది. గరిష్ఠ వేగాన్ని 180 కేఎంపీహెచ్‌కు పరిమితం చేశారు.

ఎక్స్‌సీ40 రీఛార్జ్‌ (Volvo XC40 Recharge)లో 78 కేడబ్ల్యూహెచ్‌ లిథియం ఐయాన్‌ బ్యాటరీ ప్యాక్‌ను అమర్చారు. ఒక్కసారి ఛార్జ్‌ చేస్తే 418 కి.మీ వరకు ప్రయాణిస్తుందని కంపెనీ తెలిపింది. 150 కేడబ్ల్యూ డీసీ ఫాస్ట్‌ ఛార్జర్‌తో 40 నిమిషాల్లో 0-80 శాతం ఛార్జ్‌ అవుతుందని పేర్కొంది. అదే సాధారణ 11కేడబ్ల్యూ ఏసీ ఛార్జర్‌తో అయితే పూర్తి ఛార్జింగ్‌కు ఎనిమిది గంటలు పడుతుందని వెల్లడించింది. 

ఫీచర్ల విషయానికి వస్తే.. కొత్త ఆండ్రాయిడ్‌ ఆధారిత ఇన్ఫోటైన్‌మెంట్‌ సిస్టమ్‌ను అమర్చారు. కనెక్టెడ్‌ కార్‌టెక్‌, పానరోమిక్‌ సన్‌రూఫ్‌, అడాస్‌ వంటి ఆప్షన్లను అందులో పొందుపరిచారు. బెంగళూరు సమీపంలోని హోసకోటె తయారీ కేంద్రంలో ఈ కారును అసెంబుల్‌ చేయనున్నారు. మినీ కూపర్‌ ఎస్‌ఈ, కియా ఈవీ6, ఆడీ ఈ-ట్రాన్‌, బీఎండబ్ల్యూ ఐ4 వంటి కార్లకు ఇది పోటీ ఇవ్వనుందని పరిశ్రమ వర్గాలు అంచనా వేస్తున్నాయి.