Tokenization: మీ డెబిట్‌/క్రెడిట్ కార్డుకు టోకెన్ నంబ‌రు జన‌రేట్ చేయ‌డం ఎలా?

ఇంటర్నెట్‌ డెస్క్‌: ఆన్‌లైన్‌లో క్రెడిట్‌/డెబిట్ కార్డు చెల్లింపుల‌కు సంబంధించి వినియోగ‌దారుల స‌మాచారం సైబ‌ర్ నేర‌స్థుల‌కు చిక్క‌కుండా ఉండేందుకు రిజ‌ర్వు బ్యాంక్ ఆఫ్ ఇండియా (RBI) తీసుకొచ్చిన విధాన‌మే టోక‌నైజేష‌న్‌. ఆన్‌లైన్‌లో డెబిట్‌/క్రెడిట్ కార్డు డేటా ఎంట‌ర్ చేసే పాయింట్-ఆఫ్‌-సేల్‌, యాప్ లావాదేవీల వ‌ద్ద కార్డు వివ‌రాల‌కు బ‌దులు, యునిక్ టోకెన్‌తో రీప్లేస్ చేయాల‌ని ఆర్‌బీఐ సూచించింది. సంస్థ‌లు టోకేనైజేష‌న్‌ను అమ‌లు చేసేందుకు 2022 సెప్టెంబ‌రు 30 వ‌ర‌కు గ‌డువు పొడిగించారు. కార్డు వాస్త‌వ వివ‌రాల‌ను టోకెన్ రూపంలో భద్ర‌ప‌రుస్తారు. మీరు ఏ ఈ-కామ‌ర్స్ సైట్ నుంచి మీ కార్డుకి టోకెన్ జ‌న‌రేట్ చేస్తారో అది అక్క‌డి నుంచి చేసే చెల్లింపుల‌కు మాత్ర‌మే ప‌నిచేస్తుంది.

టోక‌నైజేష‌న్ ఎలా పూర్తి చేయాలి?
స్టెప్ 1: ప్రారంభం
ఏదైనా ఈ-కామర్స్ వైబ్‌సైట్ లేదా మొబైల్ అప్లికేష‌న్‌లో కొనుగోలు చేసిన త‌ర్వాత చెక్ అవుట్ సెక్ష‌న్‌లో చెల్లింపుల లావాదేవీల‌ను ప్రారంభించాలి. 

స్టెప్‌2: కార్డు ఎంచుకోవ‌డం
చెక్ అవుట్ సమయంలో చెల్లింపుల కోసం ఇంత‌కు ముందు మాదిరిగానే మీ డెబిట్/క్రెడిట్ కార్డు వివ‌రాలు, ఇత‌ర వివ‌రాల‌ను న‌మోదు చేయాలి.

స్టెప్ 3: కార్డును సుర‌క్షితం చేయ‌డం 
ఇప్పుడు ‘ఆర్‌బీఐ మార్గ‌ద‌ర్శ‌కాల ప్ర‌కారం మీ కార్డుని సుర‌క్షితం చేసుకోండి’ లేదా ‘ఆర్‌బీఐ మార్గ‌ద‌ర్శ‌కాల ప్ర‌కారం మీ కార్డును టోక‌నైజ్ చేయండి’ అనే ఆప్షన్‌ కనిపిస్తుంది. దాన్ని ఎంచుకోవాలి.

స్టెప్ 4: టోకెన్ క్రియేట్ చేసేందుకు స‌మ్మ‌తి..
మీ బ్యాంకు మీ మొబైల్ నంబ‌రు లేదా ఈ-మెయిల్‌కి పంపిన ఓటీపీని ఎంట‌ర్ చేసి టోక‌నైజేష‌న్ కోసం మీ స‌మ్మ‌తిని తెలియ‌జేయండి.

స్టెప్ 5: టోకెన్ జ‌న‌రేష‌న్‌..
ఇప్పుడు మీ టోకెన్ జన‌రేట్ అవుతుంది. ఈ-కామ‌ర్స్ సైట్‌/అప్లికేష‌న్‌లో మీ కార్డు వాస్త‌వ వివ‌రాల‌కు బ‌దులు ఈ టోకెన్ సేవ్ అవుతుంది.

స్టెప్‌ 6: టోకనైజ్ పూర్తి..
మీరు అదే వెబ్‌సైట్ లేదా అప్లికేషన్‌ను మళ్లీ సందర్శించినప్పుడు, చెల్లింపుల‌ కోసం మీ కార్డ్‌ని గుర్తించేందుకు కార్డు చివ‌రిలోని నాలుగు అంకెలు స్క్రీన్‌పై క‌నిపిస్తాయి. వీటి ఆధారంగా కార్డును గుర్తించ‌వ‌చ్చు.