Published : 24 Jan 2022 14:41 IST

Salary Overdraft: శాలరీ ఓవర్ డ్రాఫ్ట్ గురించి తెలుసా? ఎవరు అర్హులు?

ఇంటర్నెట్‌ డెస్క్‌: అత్యవసరంగా డబ్బు అవసరం పడిందా? రుణం మంజూరు కోసం వేచి చూసేంత సమయం లేదా? అయితే శాలరీ ఓవ‌ర్‌డ్రాఫ్ట్‌ ద్వారా డబ్బు తీసుకోవచ్చు. మీరు జీతం ద్వారా ఆదాయం పొందే వ్యక్తులైతే.. మీ శాలరీ ఖాతా ఉన్న బ్యాంకు నుంచి ఈ సదుపాయం పొందొచ్చు. అయితే, శాలరీ అకౌంట్ ఉన్న ప్రతి ఒక్కరికీ ఈ సదుపాయం లభించదు. అర్హత ఉన్న వారికి మాత్రమే ఓవర్‌ డ్రాఫ్ట్‌ సౌకర్యం ఉంటుంది.

ఓవర్ డ్రాఫ్ట్ అంటే..?
ఖాతాదారులు తమ ఖాతాలో ఉండే మొత్తం కంటే ఎక్కువ మొత్తాన్ని ఉపసంహరించుకోవడాన్ని ఓవర్ డ్రాఫ్ట్ అంటారు. ఓవర్ డ్రాఫ్ట్‌లో మీరు ఖాతా నుంచి విత్ డ్రా చేసే వరకు వడ్డీ వసూలు చేయరు. మీరు తీసుకున్న అధిక మొత్తంపై మాత్రమే వడ్డీ చెల్లించాల్సి ఉంటుంది. సాధారణంగా పొదుపు, కరెంట్ ఖాతాలపై బ్యాంకులు ఈ సదుపాయం అందిస్తున్నాయి. 

శాలరీ ఓవ‌ర్‌డ్రాఫ్ట్‌ ..
మీ జీతం ఖాతాలో పొందగలిగే రివాల్వింగ్ క్రెడిటే శాలరీ ఓవర్ డ్రాఫ్ట్. మీకు డబ్బు అవసరమైనప్పుడు ఖాతాలో ఉన్న బ్యాలెన్స్‌కు మించి నిర్దిష్ట మొత్తాన్ని విత్‌డ్రా  చేసుకోవచ్చు. దీనిపై తిరిగి చెల్లించేంత వరకు వడ్డీ పడుతుంది. ఏక మొత్తంగా గానీ, వాయిదాలలో గానీ అదనంగా విత్‌డ్రా చేసుకున్న మొత్తాన్ని తిరిగి చెల్లించవచ్చు. ఆర్థిక అత్యవసరాలలో ఈ సదుపాయం ఉపయోగపడుతుంది. జీతం ఖాతాలో నిధుల కొరత కారణంగా చెక్ బౌన్స్ అవ్వడం, ఈఎంఐ, సిప్ మిస్ అవ్వకుండా ఇది సహాయపడుతుంది. 

ఓవర్ డ్రాఫ్ట్ ఎంత ఉంటుంది?

  • బ్యాంకులు తమ పాలసీని అనుసరించి ఓవర్ డ్రాఫ్ట్ సదుపాయాన్ని కల్పిస్తాయి. ఇది వేర్వేరు బ్యాంకులకు వేర్వేరుగా ఉంటుంది. వ్యక్తి క్రెడిట్ ప్రొఫైల్, క్రెడిట్ స్కోరు ఆధారంగా ఆ వ్యక్తి ఓవర్ డ్రాఫ్ట్ పరిమితిని నిర్ణయిస్తారు. బ్యాంకు, ఖాతాను బట్టి ఒక్కోసారి శాలరీ కంటే మూడింతలు అధికంగా లిమిట్ ఉంటుంది. కొన్ని బ్యాంకులు నెట్ శాలరీలో 80 నుంచి 90 శాతం వరకు మాత్రమే ఓవర్‌డ్రాఫ్ట్‌కు అనుమతిస్తాయి.
  • నెట్ శాలరీ ఆధారంగా కొన్ని బ్యాంకులు రూ.3 నుంచి రూ.5 లక్షల వరకు ఓవర్‌ డ్రాఫ్ట్‌ ఆఫర్ చేస్తుంటే మరికొన్ని బ్యాంకులు రూ.1 నుంచి రూ.1.5 లక్షల వరకు, ఇంకొన్ని బ్యాంకులు రూ.10 వేల నుంచి రూ.25 వేల వరకు మాత్రమే ఓవ‌ర్‌ డ్రాఫ్ట్‌ను ఇస్తున్నాయి. హెచ్‌డీఎఫ్‌ఎసీ, ఐసీఐసీఐ బ్యాంకుల్లో శాలరీ ఖాతా ఉన్న వారికి జీతానికి మూడు రెట్లు ఓవ‌ర్‌డ్రాఫ్ట్‌ను ఆఫర్ చేస్తుంటే, సిటీ బ్యాంక్ సువిధ శాలరీ అకౌంట్ ఉన్న వారికి శాలరీపై ఐదింతల (రూ. 5 లక్షల వరకు) ఓవ‌ర్‌ డ్రాఫ్ట్‌ను ఇస్తోంది. 
  • శాలరీ ఖాతా ఉన్న ప్రతి ఒక్కరికీ బ్యాంకులు ఓవ‌ర్‌ డ్రాఫ్ట్‌ ఆప్షన్ ఇవ్వవు. ఎంపిక చేసిన శాలరీ ఖాతాదారులకు మాత్రమే ఈ సదుపాయాన్ని అందిస్తున్నాయి. రుణ చరిత్ర, అర్హతల ఆధారంగా ఎలిజిబిలిటీని నిర్ణయిస్తారు. ఓవ‌ర్‌డ్రాఫ్ట్‌ ఖాతా తీసుకున్న వారికి ప్రాసెసింగ్ రుసములు వర్తిస్తాయి. వార్షిక పునరుద్ధరణ రుసములు ఉంటాయి.
  • శాలరీ ఓవ‌ర్‌ డ్రాఫ్ట్‌ అనేది క్రెడిట్ కార్డు రుణం మాదిరిగా ఖరీదైన రుణంగానే చెప్పొచ్చు. వార్షిక వడ్డీ రేటు 12 నుంచి 30 శాతం వరకు ఉంటుంది. చెల్లింపులు సమయానికి చేయకపోతే పెనాల్టీలు వర్తిస్తాయి. ఈ పెనాల్టీలు, ప్రాసెసింగ్ ఫీజులతో రుణం ఖరీదైనదిగా మారుతుంది. క్రెడిట్ కార్డుల మాదిరిగా వడ్డీ లేని కాలవ్యవధి ఉండదు. రివార్డు పాయింట్లు, ఆఫర్లు ఉండవు. విత్‌డ్రా చేసుకున్న రోజు నుంచి వడ్డీ వర్తిస్తుంది. అయితే మీ వద్ద డబ్బు ఉంటే ఒకేసారి మొత్తం రుణాన్ని చెల్లించే సదుపాయం ఉంటుంది. ఒకేసారి చెల్లించలేకపోతే.. నెలవారీ వాయిదాల్లో  చెల్లించేందుకు ఈఎంఐలుగా కన్వర్ట్ చేసుకోవచ్చు.
Read latest Business News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

జిల్లా వార్తలు

సినిమా

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జాతీయం

మరిన్ని

జనరల్

మరిన్ని