Adani Group: దేశంలో మరిన్ని ఎయిర్‌పోర్టులనూ నిర్వహిస్తాం: అదానీ ఎయిర్‌పోర్ట్స్‌

ఇంటర్నెట్‌ డెస్క్‌: భవిష్యత్‌లో మరిన్ని ఎయిర్‌పోర్టులను నిర్వహించేందుకు బిడ్లు దాఖలు చేస్తామని అదానీ ఎయిర్‌పోర్ట్స్‌ (Adani Airports) సీఈఓ అరుణ్‌ బన్సల్‌ తెలిపారు. భారత్‌లో అతిపెద్ద విమానాశ్రయ నిర్వహణ సంస్థగా నిలవడమే తమ లక్ష్యమని బుధవారం ఓ కార్యక్రమంలో వెల్లడించారు. భారత్‌లో మరికొన్ని ఎయిర్‌పోర్టులను కూడా ప్రభుత్వం ప్రైవేటీకరించబోతోందని వార్తలు వస్తున్న విషయం తెలిసిందే. ఈ నేపథ్యంలో వాటి కోసం జరిగే బిడ్డింగ్‌లో తాము కచ్చితంగా పాల్గొంటామని బన్సల్‌ స్పష్టం చేశారు.

భారత్‌లో విమానాశ్రయాల నిర్వహణ ఖర్చు 30- 50 శాతం దిగిరావాల్సి ఉందని బన్సల్‌ తెలిపారు. భవిష్యత్‌లో భారత విమానయాన రంగం గణనీయ వృద్ధి సాధించబోతోందని అంచనా వేశారు. ఈ నేపథ్యంలోనే మరిన్ని విమానాశ్రయాల నిర్వహణను చేపట్టడానికి తాము సిద్ధమవుతున్నామని పేర్కొన్నారు. అందులో భాగంగా అదానీ ఎయిర్‌పోర్ట్స్‌ వివిధ విభాగాల్లో భారీ ఎత్తున పెట్టుబడులు పెడుతోందన్నారు. తొలి దశలో భాగంగా నవీ ముంబయి ఎయిర్‌పోర్ట్‌లో 2024 డిసెంబరు కల్లా కార్యకలాపాలు ప్రారంభిస్తామని తెలిపారు.

ప్రస్తుతం అదానీ ఎయిర్‌పోర్ట్స్‌ దేశంలో ఏడు విమానాశ్రయాలను నిర్వహిస్తోంది. మరో విమానాశ్రయ నిర్వహణకు సిద్ధమవుతోంది. ఏవియేషన్‌ ఇన్‌స్టిట్యూట్‌ను కూడా ప్రారంభించే యోచనలో ఉన్నట్లు బన్సల్‌ తెలిపారు. భారత్‌లో విమానయాన సంస్థలు భారీ విస్తరణ ప్రణాళికలు రచిస్తున్న విషయం తెలిసిందే. ఇప్పటికే పలు సంస్థలు భారీ ఎత్తున కొత్త విమానాలకు ఆర్డర్ చేశాయి.