Nithin Kamath: ఏఐ కారణంగా ఉద్యోగుల్ని తొలగించం: జెరోదా సీఈవో

బెంగళూరు: గత కొంత కాలంగా కృత్రిమ మేధ (AI) కారణంగా ఉద్యోగాలు పోతాయనే ఆందోళనలు వ్యక్తమవుతున్నాయి. ప్రపంచవ్యాప్తంగా సుమారు 300 మిలియన్‌ మంది ఉద్యోగాలు కోల్పోతారని అంచనా. మరోవైపు పలువురు ఐటీ రంగ నిపుణులు ఉద్యోగులకు ఏఐ ప్రత్యామ్నాయం కాదని వ్యాఖ్యానించారు. ఈ నేపథ్యంలో జెరోదా (Zerodha) సీఈవో నితిన్‌ కామత్‌ (Nithin Kamath) ఏఐ, ఉద్యోగుల తొలగింపు గురించి ఆసక్తికర వ్యాఖ్యలు చేశారు. తమ సంస్థ కార్యకలాపాల్లో కూడా ఏఐ సాంకేతికతను వినియోగిస్తామని తెలిపారు. అయితే, ఏఐ కారణంగా తమ సంస్థలో ఉద్యోగుల్ని తొలగించబోమని స్పష్టం చేశారు. ఈ మేరకు ఆయన సంస్థలో ఏఐ వినియోగానికి సంబంధించి కొత్త విధివిధానాలను రూపొందించినట్లు ట్వీట్‌ చేశారు. 

‘‘జెరోదాలో ఏఐ పాలసీని పరిచయం చేస్తున్నాం. ఈ సందర్భంగా సంస్థ ఉద్యోగులకు ఒక విషయం చెప్పాలనుకుంటున్నా. కొత్త సాంకేతికత కారణంగా ఉద్యోగుల్ని తొలగించం. 2021లో అందరు ఏఐ గురించి చర్చిస్తున్న సమయంలో దాంతో ఎలాంటి ఉపయోగంలేదని భావించాం. కానీ, ఇటీవలి కాలంలో ఏఐ సాంకేతికత కారణంగా చోటుచేసుకుంటున్న మార్పులను అంగీకరిస్తున్నాం. ప్రస్తుతం చాలా కంపెనీలు ఉద్యోగుల్ని తొలగిస్తూ.. ఏఐపై నింద వేస్తున్నాయి. ఈ క్రమంలో కొన్ని సంస్థలు ఏఐ సాయంతో భారీగా లాభాలు ఆర్జించి తమ వాటాదారులను ధనవంతులను చేస్తాయి. ఇది సమాజంలో భారీ అసమానతలకు కారణమవుతుంది. మానవీయ కోణంలో ఇది ఏ మాత్రం మంచిది కాదు’’ అని నితిన్‌ అభిప్రాయపడ్డారు.

ఏఐ వినియోగంపై ప్రపంచవ్యాప్తంగా అన్ని దేశాలు పరిమితులు విధించాలని కోరారు. ఏఐ కారణంగా ఒక దేశం శక్తివంతంగా మారితే.. మరో దేశం చూస్తూ ఊరుకోదని అన్నారు. అలా ప్రపంచంలోని దేశాలు, వ్యాపార సంస్థలు, మనుషుల మధ్య అసమానతలు ప్రారంభమవుతాయని తెలిపారు. ఏఐ పూర్తిస్థాయి ప్రభావాన్ని చూసేందుకు మరికొన్నేళ్లు సమయం పడుతుందని అభిప్రాపయపడ్డారు. ఒక స్టాక్‌ బ్రోకరేజ్‌ సంస్థ సీఈవో నుంచి ఇలాంటి అభిప్రాయం వ్యక్తం కావడం చాలా మందికి ఆశ్చర్యంగా ఉంటుందని ట్వీట్‌లో పేర్కొన్నారు.