Crime: రూ.కోటి ఖర్చు అయినా ఫర్వాలేదు. అతడు చనిపోవడం నాకు కావాలి..

బెంగళూరు: కర్ణాటక కాంగ్రెస్‌ నేత గోపాలకృష్ణ చిక్కుల్లో పడ్డారు. భాజపా నేత, కర్ణాటకలోని యలహంక ఎమ్మెల్యే ఎస్‌ఆర్‌ విశ్వనాథ్‌ను చంపేయండి అంటూ గోపాల్‌ కృష్ణ వేసిన మర్డర్‌ ప్లాన్‌ వీడియో సోషల్‌ మీడియాలో వైరల్‌గా మారింది. మూడు నిమిషాల నిడివి ఉన్న ఈ వీడియోలో గోపాల్‌ కృష్ణ  సోఫా మీద కూర్చొని... ‘‘ఆ ఎమ్మెల్యే విశ్వనాథ్‌ను చంపేయండి. రూ.కోటి ఖర్చు అయినా ఫర్వాలేదు. అతడు చనిపోవడం నాకు కావాలి. దీని గురించి ఎవరికీ తెలియకూడదు. ఈ రహస్యం మన మధ్యే ఉండాలి’’ అంటూ మరో వ్యక్తితో జరిపిన సంభాషణలు సంచలనంగా మారాయి. కాగా ఈ వీడియోని పరిశీలించిన పోలీసులు.. ఇది ఏ రోజున రికార్డు అయిందనే వివరాలు లేవని, గోపాల్‌కృష్ణపై తదుపరి విచారణ జరుపుతామన్నారు. ఈ ఘటనకు సంబంధించి కర్ణాటక హోంశాఖ మంత్రి  మాట్లాడుతూ.. ‘‘ పోలీసులు ఈ విషయాన్ని సీరియస్‌గా తీసుకున్నారు. ఎఫ్‌ఐఆర్‌ దాఖలు చేస్తున్నారు. విశ్వనాథ్‌ కూడా దీని గురించి నాతో మాట్లాడారు. ఆయనకు భద్రత కల్పిస్తాం. అయితే భద్రతా ఇవ్వాలా వద్దా అనేది ఇంటలిజెన్స్‌ విభాగం చేతుల్లో ఉంది. ప్రస్తుతం పోలీసులు దర్యాప్తు చేస్తున్నారు’’ అని తెలిపారు.