Gujarat: ఘోర ప్రమాదం.. ఫ్యాక్టరీ గోడ కూలి 12మంది దుర్మరణం

అహ్మదాబాద్‌: గుజరాత్‌లో ఘోర ప్రమాదం సంభవించింది. మోర్బి జిల్లా హల్వాద్‌లోని ఓ ఉప్పు ఫ్యాక్టరీ గోడ కూలడంతో పెను విషాదం చోటుచేసుకుంది. ఈ ఘటనలో కనీసం 12మంది కార్మికులు దుర్మరణం చెందారు. దాదాపు 30మందికిపైగా కూలీలు శిథిలాల కింద చిక్కుకున్నట్టు తెలుస్తోంది. ఈ ఘటనకు సంబంధించిన సమాచారం అందుకున్న పోలీసులు ఘటనాస్థలికి చేరుకొని సహాయక చర్యలు కొనసాగిస్తున్నారు. క్షతగాత్రులను స్థానిక ఆస్పత్రులకు తరలించారు. మృతుల సంఖ్య ఇంకా పెరిగే అవకాశం ఉన్నట్టు సమాచారం. ఈ ఘటనపై రాష్ట్ర మంత్రి బ్రిజేశ్‌ మెజ్రా స్పందించారు. మృతుల కుటుంబాలు ప్రభుత్వం అండగా నిలబడుతుందని భరోసా ఇచ్చారు.

మృతుల కుటుంబాలకు రూ.2లక్షల చొప్పున పరిహారం: పీఎంవో

ఈ విషాద ఘటనపై ప్రధాని నరేంద్ర మోదీ దిగ్భ్రాంతి వ్యక్తంచేశారు. మృతుల కుటుంబాలకు సానుభూతి తెలుపుతూ ట్వీట్‌ చేశారు. ఈ ప్రమాదంలో గాయపడిన వారంతా త్వరగా కోలుకోవాలని ఆకాంక్షించారు. బాధిత కుటుంబాలకు స్థానిక ప్రభుత్వ యంత్రాంగం అన్నిరకాలుగా సహాయ సహకారాలు అందించాలని సూచించారు. మరోవైపు, ఈ ప్రమాదంలో ప్రాణాలు కోల్పోయిన వారి కుటుంబాలకు పీఎంఎన్ఆ‌ర్‌ఎఫ్‌ నుంచి రూ.2లక్షల చొప్పున ఇవ్వనున్నట్టు ప్రధానమంత్రి కార్యాలయం (పీఎంవో) వెల్లడించింది. క్షతగాత్రులకు రూ.50వేలు చొప్పున సాయం ప్రకటించింది.