Crime news: బురుండి జైలులో మంటలు.. 38మంది ఖైదీలు మృతి!

జితేగా: తూర్పు ఆఫ్రికా దేశమైన బురుండిలో పెను విషాదం చోటుచేసుకుంది. ఆ దేశ రాజధాని  జైలులో భారీ అగ్ని ప్రమాదం సంభవించింది. రాత్రి పూట ఖైదీలంతా నిద్రపోతున్న సమయంలో అకస్మాత్తుగా పెద్ద ఎత్తున మంటలు చెలరేగడంతో 38మంది ఖైదీలు సజీవదహనమయ్యారు. మరో 69మంది తీవ్రంగా గాయపడ్డారు. ఈ ఘటనలో మృతుల సంఖ్య పెరిగే అవకాశం ఉంది. జైలులో ఖైదీలు మంటల్లో కాలిపోయారు.. క్షతగాత్రుల్ని పోలీసులు, సైన్యం ట్రాక్టర్లలో ఆస్పత్రికి తరలిస్తున్నారంటూ ఓ ప్రత్యక్ష సాక్షి ఫోన్‌లో చెప్పినట్టు ఏఎఫ్‌పీ మీడియా సంస్థ పేర్కొంది. అయితే, ఈ మంటలు చెలరేగడానికి కారణాలేంటనేది మాత్రం ఇంకా తెలియరాలేదు.

అయితే, భారీగా ఎగసి పడుతున్న మంటలను చూసి కేకలు పెట్టినా.. పోలీసులు తమ క్వార్టర్స్‌ తలుపులు తీసేందుకు నిరాకరించారని ప్రత్యక్షసాక్షిగా ఉన్న ఖైదీ పేర్కొన్నట్టు ఆ మీడియా సంస్థ తెలిపింది. సమాచారం అందుకున్న రెడ్‌ క్రాస్‌ బృందాలు ఘటనా స్థలానికి చేరుకొని సహాయక చర్యలు చేపట్టాయి. ప్రస్తుతం మంటలు అదుపులోకి వచ్చాయి. తీవ్రంగా గాయపడిన వారిని ఆస్పత్రులకు తరలించగా.. స్వల్ప గాయాలైన వారికి అక్కడే చికిత్స అందిస్తున్నారు.  మరోవైపు, ఆ దేశ ఉపాధ్యక్షుడు ప్రోస్పెర్‌ బజోంబాంజాతో పాటు కొందరు మంత్రులు ఘటనా స్థలానికి చేరుకొన్నారు.

► Read latest Crime News and Telugu News