Noida: పెళ్లి వేడుకలో కాల్పులు.. పలువురికి గాయాలు..

నోయిడా: పెళ్లి వేడుకలో జరిగిన కాల్పుల్లో ఓ పసిబిడ్డతో సహా ఆరుగురు గాయపడిన ఘటన ఉత్తర్‌ప్రదేశ్‌లోని బాదల్‌పూర్‌లో చోటు చేసుకొంది. ఈ ఘటన వివరాలు ఆలస్యంగా వెలుగులోకి వచ్చాయి. బాదల్‌పూర్‌ పోలీస్‌ స్టేషన్‌ పరిధిలో సోమవారం రాత్రి ఒక పెళ్లి వేడుక జరిగింది. వరుడు అక్కడకు చేరుకొన్నట్లు సంకేతంగా బంధువు ఒకరు తుపాకీతో గాల్లోకి కాల్పులు జరిపారు.

ఆ సమయంలో తూటాలు ప్రమాదవశాత్తు నేలను తాకి చుట్టుపక్కల వారిపైకి దూసుకెళ్లాయి. ఈ ఘటనలో ఆరుగురు గాయపడ్డారు. పెళ్లివేడుకల్లో కాల్పులు జరపడంపై నిషేధం ఉందని పోలీసులు తెలిపారు. వారు కేసు నమోదు చేసుకొని దర్యాప్తు చేస్తున్నారు.