Road Accident: కర్ణాటకలో ఘోర రోడ్డు ప్రమాదం.. ఏడుగురు మృతి

బెళగావి: కర్ణాటకలోని బెళగావి వద్ద ఆదివారం జరిగిన ఘోర రోడ్డు ప్రమాదంలో ఏడుగురు కూలీలు ప్రాణాలు కోల్పోయారు. మరో 11 మంది తీవ్రంగా గాయపడ్డారు. బాధితులు గోకాక్‌ తాలుకా అక్కతంగియారహళ్ల గ్రామానికి చెందినవారిగా గుర్తించారు. గ్రామం నుంచి బెళగావి వెళ్తుండగా వారు ప్రయాణిస్తున్న వాహనం అదుపుతప్పి బోల్తాపడింది. ఈ ఘటనలో ఏడుగురు అక్కడికక్కడే ప్రాణాలు కోల్పోయారు. గాయపడిన మరో 11 మందిని సమీప ఆస్పత్రికి తరలించారు. వీరిలో ముగ్గురి పరిస్థితి విషమంగా ఉన్నట్లు తెలుస్తోంది. బాధితులందరూ భవన నిర్మాణ కార్మికులుగా పోలీసులు తెలిపారు. పనికోసం బెళగావి వెళ్తున్న సమయంలో..  డ్రైవర్ నియంత్రణ కోల్పోవడంతోనే ఈ ప్రమాదం జరిగినట్లు అనుమానిస్తున్నారు.