UP: 42 ఏళ్ల క్రితం 10 హత్యలు.. 90 ఏళ్ల వృద్ధుడికి జీవిత ఖైదు!

లఖ్‌నవూ: ఉత్తర్‌ప్రదేశ్‌లో దాదాపు 42 ఏళ్ల క్రితం నాటి సామూహిక హత్య కేసు (Shikohabad Murder Case)లో ఓ 90 ఏళ్ల వృద్ధుడికి జీవిత ఖైదు పడింది. దీంతోపాటు కోర్టు అతనికి రూ.55 వేల జరిమానా కూడా విధించింది. అధికారుల వివరాల ప్రకారం.. 1981లో అప్పటి మైన్‌పురీ జిల్లాలోని శికోహాబాద్‌లో పలువురు కలిసి 10 మంది దళితులను కాల్చి చంపారు. దీనికి సంబంధించి పోలీసులు కేసు నమోదు చేసి, 10 మంది నిందితులపై మెయిన్‌పురి కోర్టులో ఛార్జిషీటు దాఖలు చేశారు.

అయితే, శికోహాబాద్‌ ఇప్పుడు ఫిరోజాబాద్ జిల్లాలోని మఖన్‌పూర్ పరిధిలోకి మారింది. ఈ క్రమంలో 2021 అక్టోబర్‌లో ఈ కేసు ఫిరోజాబాద్‌కు బదిలీ అయింది. అయితే, ఈ కేసులోని 10 మంది నిందితుల్లో తొమ్మిది మంది విచారణ సమయంలో మరణించారు. ప్రస్తుతం జీవించి ఉన్న ఏకైక నిందితుడు గంగా దయాళ్‌ (90)ను కోర్టు ఇటీవల దోషిగా నిర్ధారించింది. అతనికి జీవిత ఖైదు విధించింది. రూ.55 వేల జరిమానా కూడా వేసింది. చెల్లించని పక్షంలో అదనంగా 13 నెలలు జైలు శిక్ష అనుభవించాల్సిందిగా ఆదేశించింది.