ఆ ఇంటి వద్ద 60మంది పోలీసులు, సీసీటీవీలు!

హాథ్రస్‌ ఘటన బాధితురాలి కుటుంబానికి భారీ భద్రత

హాథ్రస్‌: దేశంలో సంచలనం సృష్టించిన హాథ్రస్ హత్యాచారం కేసులో బాధితురాలి ఇంటి వద్ద పోలీసులు భారీ భద్రత ఏర్పాటు చేశారు. బుల్గర్హి గ్రామంలో బాధితురాలి కుటుంబ సభ్యులకు భద్రతగా 60 మంది పోలీసులు, ఎనిమిది సీసీటీవీ కెమెరాలు ఉంచినట్టు పోలీసులు శుక్రవారం తెలిపారు. డీఐజీ షాలాభ్‌ మాథుర్‌ను లఖ్‌నవూ నుంచి హాథ్రస్‌కు నోడల్‌ అధికారిగా పంపారు. అవసరమైతే అక్కడ కంట్రోల్‌ రూం కూడా ఏర్పాటు చేయనున్నారు. మహిళా పోలీసులతో పాటు మొత్తం 60 మంది భద్రతా సిబ్బందిని మోహరించినట్టు హాథ్రస్‌ ఎస్పీ వినీత్‌ జైశ్వాల్‌ తెలిపారు. ఈ కేసులో బాధిత కుటుంబం, సాక్షులకు పోలీసులు భద్రతగా షిఫ్ట్‌ల్లో పనిచేస్తారని పేర్కొన్నారు. సీసీటీవీ కెమెరాలతో ఆ ఇంటిని నిరంతరం పర్యవేక్షిస్తామని ఎస్పీ తెలిపారు. అలాగే, ఆ ఇంటి వద్దకు వచ్చేవారికి సంబంధించిన ఓ రిజిస్టర్‌ను కూడా పెట్టినట్టు చెప్పారు.