ఇద్దరు కుమారులను చంపిన తండ్రి

కల్యాణదుర్గం: అనంతపురం జిల్లా కల్యాణదుర్గం మండలం బోయలపల్లెలో దారుణం చోటు చేసుకుంది. కన్న తండ్రే వారి పాలిట కాలయముడయ్యాడు. మతి స్థిమితం లేని తండ్రి తన ఇద్దరు కుమారులను చంపి పాతిపెట్టాడు. వివరాల్లోకి వెళితే.. బోయలపల్లి గ్రామానికి చెందిన రవి, రాధమ్మ దంపతులకు ఇద్దరు కుమారులు ఉన్నారు. బుధవారం రాత్రి రవి తన ఇద్దరు కుమారులు సుదీప్‌ (5), సుధీర్‌(7)లను ఇంట్లోనే నిద్రపోతున్న సమయంలో గొంతు నులిమి హతమార్చాడు. అనంతరం రెండు మృతదేహాలను ఈడ్చుకెళ్లి గ్రామానికి రెండు కిలోమీటర్ల దూరంలో ఉన్న అటవీ ప్రాంతంలో పూడ్చిపెట్టాడు. 

పిల్లలు కనిపించకపోవడంతో తల్లి రాధమ్మ బోరున విలపిస్తూ ఏం చేశావంటూ రవిని గట్టిగా  నిలదీసింది. దీంతో అసలు విషయం వెలుగు చూసింది. రవికి గత కొంతకాలంగా మతిస్థిమితం లేదని గ్రామస్థులు చెబుతున్నారు. సమాచారమందుకున్న పోలీసలు ఘటనాస్థలికి చేరుకుని మృతదేహాలను వెలికితీశారు. కేసు నమోదు చేసి దర్యాప్తు చేస్తున్నారు.