Olxలో మోసాలకు పాల్పడుతున్న ముఠా అరెస్టు

హైదరాబాద్‌: గత కొంతకాలంగా ఓఎల్ఎక్స్‌లో వాహనాల నకిలీ ఫొటోలు పెడుతూ పలువురిని మోసం చేస్తున్న ముఠాను హైదరాబాద్ సైబర్ క్రైం పోలీసులు అరెస్టు చేశారు. రాజస్థాన్ రాష్ట్రం భారత్‌పూర్‌కు చెందిన 9 మందిని సీసీస్ పోలీసులు అదుపులోకి తీసుకున్నారు. నగరానికి చెందిన ఎనిమిది మందిని వీరు మోసం చేసినట్లు పోలీసులు తెలిపారు. ఓఎల్ఎక్స్‌లో ద్విచక్రవాహనాలు, కార్లను తక్కువ ధరకు విక్రయిస్తామంటూ పోస్టులు పెడుతూ పలువురి వద్ద నుంచి డబ్బులు బదిలీ చేయించుకున్నట్లు పోలీసులు తెలిపారు. నగదు పంపినా బుక్‌ చేసుకున్న వస్తువులు రాకపోవడంతో మోసపోయామని గ్రహించిన బాధితులు సీసీస్‌ పోలీసులకు ఫిర్యాదు చేశారు. బాధితుల ఫిర్యాదు మేరకు తొమ్మిది మంది నిందితులను అరెస్టు చేసి రిమాండ్‌కు తరలించినట్లు సైబర్‌ క్రైం పోలీసులు తెలిపారు.