తల్లి సొంత వైద్యం.. మైనర్‌ బాలిక మృతి!

ధర్మపురి: జగిత్యాల జిల్లా ధర్మపురిలో దారుణం చోటుచేసుకుంది. దళిత కాలనీకి చెందిన ఓ మైనర్‌ బాలిక (16) నెలలు నిండకముందే మృతశిశువుకు జన్మనిచ్చి మరణించింది. తల్లి సొంత వైద్యమే బాలిక మృతికి ప్రధాన కారణంగా పోలీసులు భావిస్తున్నారు. వివరాల్లోకి వెళితే.. దళితకాలనీలో నివాసముంటున్న 45 ఏళ్ల ఓ మహిళ కూలి పనులు చేస్తూ కుమార్తెతో జీవిస్తోంది. భర్త చాలా ఏళ్ల క్రితమే మరణించాడు. ఈ క్రమంలో ఆ మహిళ కుమార్తె ఒకరి చేతిలో మోసపోయి గర్భం దాల్చింది. ప్రస్తుతం ఆమెకు ఏడో నెల. ఈ విషయం బయటకు తెలియకుండా కన్న తల్లే వైద్యం చేస్తూ వస్తోంది. ఈ క్రమంలో సొంత వైద్యం వికటించడంతో ఆ బాలికకు నొప్పులు తీవ్రమయ్యాయి. మృత శిశువుకు జన్మనిచ్చిన తర్వాత బాలిక మరణించింది. గుట్టుచప్పుడు కాకుండా రెండు మృతదేహాలను గోదావరి తీరంలో ఖననం చేశారు. ఆ ఘటన సోమవారం వెలుగులోకి రావడంతో పోలీసు, రెవెన్యూ అధికారుల సాయంతో మృతదేహాన్ని బయటకు తీసి శవ పంచనామా నిర్వహించారు. పురపాలక సిబ్బంది ఫిర్యాదు మేరకు కేసు దర్యాప్తు చేస్తునట్టు ఎస్సై శ్రీకాంత్‌ తెలిపారు.