రూ.2.5 కోట్ల విలువైన పార్టీ డ్రగ్స్ పట్టివేత

కోల్‌కతా: పార్టీ డ్రగ్స్‌గా వ్యవహరించే యాబా ట్యాబ్లెట్లను పెద్ద మొత్తంలో అక్రమంగా తరలిస్తుండగా కోల్‌కతా పోలీసులు స్వాధీనం చేసుకున్నారు. అంతర్జాతీయ మార్కెట్‌లో వీటి విలువ రూ.2.5 కోట్లు ఉంటుందని పోలీసులు అంచనా వేస్తున్నారు. ఈ కేసులో ఇద్దరు నిందితులను అరెస్టు చేశారు. వీటిని బంగ్లాదేశ్‌కు తరలించే ప్రయత్నాల్లో ఉన్నట్లు ప్రాథమిక విచారణలో తేలింది. అరెస్టయిన వారి నుంచి 50 వేల ట్యాబ్లెట్లను స్వాధీనం చేసుకున్నట్లు ఓ సీనియర్‌ అధికారి వెల్లడించారు. 

బీఎస్ఎఫ్ దళాలు పశువుల అక్రమ రవాణాపై ఉక్కుపాదం మోపిన తరువాత 2019 నుంచి యాబా ట్యాబ్లెట్ల అక్రమ రవాణా పెరిగింది. దక్షిణ బెంగాల్‌లోని ఇండో-బంగ్లాదేశ్ సరిహద్దు మీదుగా ఈ వ్యాపారం జోరందుకుంది. ఈ ఏడాది ఫిబ్రవరిలో మణిపూర్‌కు చెందిన ఇద్దరు మాదకద్రవ్యాల డీలర్లను దక్షిణ కోల్‌కతాకు చెందిన ఎస్‌టీఎఫ్ పోలీసులు అరెస్టు చేశారు. వారినుంచి రూ.2.3 కోట్ల విలువైన యాబా ట్యాబ్లెట్లను స్వాధీనం చేసుకున్నారు.