crime news:అమెరికాలో మళ్లీ తుపాకీ మోత.. ముగ్గురి మృతి

శాన్‌ ఆంటోనియో: అమెరికాలో మరోసారి తుపాకీ పేలింది. టెక్సాస్‌ రాష్ట్రంలోని శాన్‌ ఆంటోనియో నగరంలోని స్పోర్ట్స్‌ బార్‌లో యువకులు మధ్య చోటుచేసుకున్న ఘర్షణ కాల్పులకు దారితీసింది. దీంతో ఓ వ్యక్తి జరిపిన కాల్పుల్లో ముగ్గురు మృతిచెందగా.. ఇద్దరికి గాయాలైనట్టు పోలీసులు వెల్లడించారు. తెల్లవారు జామున 3.30గంటల సమయంలో బూమ్‌ బూమ్‌ స్పోర్ట్స్‌ క్లబ్‌లో ఈ ఘటన చోటుచేసుకున్నట్టు పోలీసులు తెలిపారు. ఓ వ్యక్తి కారులో వచ్చి పొడవైన తుపాకీతో పార్కింగ్‌ వద్దే ఐదుగురిపై కాల్పులకు తెగబడినట్టు పేర్కొన్నారు. 

ఈ ఘటనలో ఇద్దరు అక్కడికక్కడే మృతిచెందగా.. మరో వ్యక్తి ఆస్పత్రిలో చికిత్సపొందుతూ ప్రాణాలు కోల్పోయాడన్నారు. ఈ ఘటనలో గాయపడిన మరో ఇద్దరి పరిస్థితి విషమంగా ఉన్నట్టు చెప్పారు. బాధితులంతా 20 నుంచి 30 ఏళ్ల మధ్య వయస్కులేనన్నారు. నిందితుడి వయస్సు కూడా దాదాపు అంతే ఉన్నప్పటికీ తన గురించి ఏ వివరాలు చెప్పడంలేదని పోలీసులు తెలిపారు. ఈ ఘటనలో ఇంకా ఎవరినీ అరెస్టు చేయలేదని తెలిపారు.