ఇడుక్కి ఘటన: మరో 6మృతదేహాలు వెలికితీత 

తిరువనంతపురం: కేరళలోని ఇడుక్కిలో ఇటీవల కొండ చరియలు విరిగి పడిన ఘటనలో మరో ఆరు మృతదేహాలను వెలికి తీశారు. దీంతో మొత్తం మృతుల సంఖ్య 49కి పెరిగింది. రాష్ట్రంలో పలుచోట్ల భారీ వర్షాలు కురుస్తుండటంతో సహాయక చర్యలకు ఆటంకంగా మారింది. ప్రస్తుతం సహాయక చర్యలు కొనసాగుతున్నాయి.  కేరళలోని పలు ప్రాంతాల్లో ఆదివారం కూడా భారీ వర్షాలు కురిసినట్టు భారత వాతావరణ శాఖ తెలిపింది. కాసర్‌గోడ్‌, కన్నూర్‌, వయనాడ్‌, కొలికోడ్‌, మళప్పురం, అళప్పుళ జిల్లాల్లో రెడ్‌ అలర్ట్‌ ప్రకటించింది. మంగళవారం భారీ వర్షాలు తగ్గుముఖం పట్టే అవకాశం ఉందని అంచనా వేసింది. రాజమలై సమీపంలోని పెట్టైముడిలో శుక్రవారం రోజు భారీ కొండచరియలు విరిగిపడగా.. తమిళనాడుకు చెందిన తేయాకు కార్మికులు వాటికింద చిక్కుకున్న ఘటన పెను విషాదం నింపిన విషయం తెలిసిందే. దీంతో రంగంలోకి దిగిన సహాయక బృందాలు ఘటనా స్థలంలో సహాయక చర్యలు కొనసాగిస్తున్నాయి.