ఏకంగా ఎటీఎం యంత్రాన్నే ఎత్తుకుపోయారు..!

జల్నా: మహారాష్ట్రలోని జల్నాలో దుండగులు రెచ్చిపోయారు. బ్యాంకును ఆనుకొని ఉన్న ఓ ఏటీఎం కేంద్రంలోకి చొరబడి ఏకంగా ఏటీఎం యంత్రాన్నే ఎత్తుకుపోయారు. ఈ ఘటన జల్నా నగరం నాగేవాడి ప్రాంతంలో చోటుచేసుకుంది. పోలీసులు తెలిపిన వివరాల ప్రకారం.. శనివారం తెల్లవారు జామున ఈ ఘటన జరిగింది. ఏటీఎం కేంద్రంలోకి చొరబడిన ఓ వ్యక్తి డబ్బుతో ఉన్న ఏటీఎంను తీసుకొని ముందుగానే పార్క్‌ చేసి ఉంచిన వాహనంలోకి ఎక్కించి అక్కడినుంచి పరారైనట్లు పోలీసులు తెలిపారు. ఈ ఏటీఎంలో దాదాపు రూ.28.64లక్షల నగదు ఉన్నట్టు తెలిపారు.  బ్యాంకు మేనేజర్‌ ఇచ్చిన ఫిర్యాదు మేరకు కేసు నమోదు చేసుకున్న పోలీసులు నిందితుల కోసం గాలిస్తున్నారు.