Alcohol: పోలీస్‌స్టేషన్‌లో మద్యం తాగుతూ.. ఫొటోకి పోజు..!

లఖ్‌నవూ: ఏకంగా పోలీస్‌స్టేషన్‌ (Police station)లోనే మద్యం (Alcohol) తాగాడు ఓ ఘనుడు. అధికారులు లేని సమయంలో స్టేషన్‌ ఇన్‌ఛార్జి కుర్చీలో దర్జాగా కూర్చొని ఫొటో తీసుకొన్నాడు. ఈ ఘటన ఉత్తర్‌ప్రదేశ్‌ (Uttarpradesh)లోని సహరన్‌పూర్‌ పట్టణం ఖతాఖేరీ పోలీస్ స్టేషన్లో చోటు చేసుకుంది. పోలీసులు తెలిపిన వివరాల ప్రకారం..

ఇమ్రాన్‌ అనే వ్యక్తి ఓ పండుగ సందర్భంగా అధికారులు గస్తీలో ఉన్న సమయంలో ఖతాఖేరీ పోలీస్‌ స్టేషన్‌లోకి చొరబడ్డాడు. తనతో పాటు మద్యం సీసాను కూడా వెంట తెచ్చుకున్నాడు. స్టేషన్‌ ఇన్‌ఛార్జి గదిలోకి వెళ్లి అంతా సిద్ధం చేసుకుని గ్లాసులోకి మద్యం పోస్తూ ఫొటో దిగాడు. ప్రస్తుతం ఈ ఫొటో సోషల్‌ మీడియాలో వైరల్‌గా మారటంతో ఉన్నతాధికారుల దృష్టికి వచ్చాయి. వెంటనే సేష్టన్‌ ఇన్‌ఛార్జిని పిలిచి వివరాలు అడగగా అతడు నోరు మెదపలేదు. తక్షణమే ఆ అధికారిని విధుల నుంచి సస్పెండ్‌ చేశారు. నిందుతుడ్ని అరెస్టు చేసి కేసు నమోదు చేసినట్లు ఎస్‌ఎస్‌పీ విపన్‌ తడ తెలిపారు.