పెళ్లి ట్రాక్టర్ బోల్తా.. ఒకరి మృతి

ఉరవకొండ (అనంతపురం): అందరూ పెళ్లి వేడుకకు వెళ్లి ఆనందంగా తిరుగు పయనమయ్యారు. కానీ, ఆ సంతోషం ఎక్కువసేపు నిలవలేదు. ప్రమాదవశాత్తు వారు ప్రయాణిస్తున్న పెళ్లి ట్రాక్టర్ బోల్తా పడింది. ఈ ఘటనలో ఒకరు మృతి చెందగా, 20 మందికి తీవ్ర గాయాలయ్యాయి. స్థానికుల కథనం ప్రకారం.. అనంతపురం జిల్లా కూడేరు మండలం శివరామపేటలోని వధువు ఇంట్లో గురువారం మధ్యాహ్నం పెళ్లి జరిగింది. వరుడు గ్రామమైన మరూట్ల తండా నుంచి పెళ్లి కొచ్చిన బంధువులు సాయంత్రం ట్రాక్టర్‌లో స్వగ్రామానికి తిరిగి బయలుదేరారు. ఈ క్రమంలో శివరామపేట వద్ద ట్రాక్టర్ బోల్తా పడింది. ఈ ప్రమాదంలో ముబీనా (20) మృతి చెందింది. మరో 20 మందికి తీవ్ర గాయాలయ్యాయి. ఘటనా స్థలానికి చేరుకున్న కూడేరు పోలీసులు క్షతగాత్రులను అనంతపురం ప్రభుత్వ ఆస్పత్రికి తరలించారు. కేసు నమోదు చేసుకొని దర్యాప్తు చేపట్టారు.